चीनका राष्ट्रपति सी चिनफिङ शुक्रवार दुईदिने भ्रमणका क्रममा म्यान्मार पुगेका छन् । विगत १९ वर्षमा म्यान्मार भ्रमण गर्ने उनी पहिलो चिनियाँ राष्ट्रपति हुन् । 

चीन र म्यान्मारबीच ७० वर्षको कूटनीतिक सम्बन्धको अवसरमा सीको भ्रमण भएको हो । दुवै देशले अल्पसंख्यक मुसलमानहरूप्रति गरेको व्यवहारका विषयमा आलोचना खेपिरहेका छन् । चीनमा उइगुर र म्यान्मारमा रोहिंग्यामाथि सरकारले अत्याचार गरेको पश्चिमाहरू आलोचना गर्ने गर्छन् ।

युरोपेली संघ र अमेरिकाले म्यान्मारलाई रोहिंग्याको ‘नरसंहार’ गरेको भन्दै आलोचना गरेका छन् । तर चीनले म्यान्मारलाई समर्थन गरिरहेको छ । 

बेइजिङले नेपितालाई रोहिंग्यामाथिको दमनमा समर्थन गरेको छ । सीले भ्रमणका क्रममा देशकी वास्तविक नेता आङ सान सु की र म्यान्मारका सशस्त्र बलका कमान्डर इन चीफ मिन आङ ह्लाइङसँग पनि भेट्ने कार्यक्रम छ । 

म्यान्मार चीनको पेटी सडक पहलको एक साझेदार हो । चीन–म्यान्मार आर्थिक कोरिडोरमा अन्य परियोजना बाहेक म्यान्मारको पश्चिमी किनारमा रहेको क्याउकफ्युमा गहिरो बन्दरगाह बनाउने प्रोजेक्ट पनि छ । चीन र भारतबीचमा रहेको म्यान्मारसँग वैश्विक आपूर्ति शृंखलाको फाइदा लिने सम्भाव्यता छ । 

बंगालको खाडीमा चीनले विकास गरिरहेको डीप सी पोर्टले भारतलाई चीनले घेरिरहेको छ भन्ने चिन्ता दिएको छ । श्रीलंकाले चीनलाई हम्बनटोटा बन्दरगाह ९९ वर्षका लागि लीजमा दिइसकेको छ । अनि अरब सागरमा रहेको पाकिस्तानको ग्वादर बन्दरगाह पनि चीनले बनाउँदैछ । 

ढाका र नेपिताले रोहिंग्या संकटका विषयमा चीनलाई मध्यस्थकर्ताको हैसियत दिइसकेका छन् । अनि दक्षिण एसियामा नयाँ दिल्लीलाई थप एक्ल्याउँदै नेपालले पनि चीनसँग तीव्र गतिको रेल बनाउन विषयमा सम्झौता गरेको छ । अनि श्रीलंकामा हालै निर्वाचित भएर आएका राष्ट्रपति गोताबाया राजपक्षे र उनका दाइ प्रधानमन्त्री महिन्दा राजपक्षे बेइजिङपक्षधर नै हुन् ।

एजेन्सी