लगातारको हिउँदे वर्षाले बालीनाली राम्रो हुने आशले महोत्तरीका किसान हर्षित भएका छन् । 

लगातारको वर्षाले जाडो बढाएर बाटोघाटो हिलाम्य भएपनि फसल (बाली) राम्रो हुने आशले किसानमा खुशी छाएको हो ।

‘पानी परी रहेपछि जाडो बढाउनसँगै बाटोघाटो हिलाम्य भएर हिँडडुल गर्न त सकस बढेको छ,’ जिल्लाको भङ्गाहा नगरपालिका–४ थारूटोल बनराका ७० वर्षीय किसान रामऔतार सिंह थारूले भने, ‘तर महिनैपिच्छे परेको हिउँदे वर्षाले बालीनाली भने राम्रो फस्टाउने आश छ ।’

महोत्तरीसहित मध्यपूर्वी तराईमा मंसिर निगल्दोयता ३ पटक राम्रो वर्षा भएको छ । ‘गहुँ छर्न चिस्यान नभएर छट्पटाइएका बेला मङ्सिर निगल्दो पानी पर्‍यो,’ भङ्गाहा–४ कै रामनगर बस्तीका अर्का किसान बृदेबसिंह दनुवारले भने, ‘त्यसपछि पुस तेस्रो साता र तिलासक्रायत (माघ संक्रान्ति) पर्वलगत्तै यसपालि हिउँदमा ३ पटक पानी परी सक्यो, हिउँदे बालीलाई चाहिँदो चिस्यान भएपछि अब राम्रो उब्जने आश जागेको छ ।’

यसपालि मंसिर निगल्दो, पुस तेस्रो साता र माघमै राम्रो वर्षा भएपछि दलहन (अरहर, बदाम, मुसुरो र केराउसहितका कोसेबाली), उखु, गहुँ र फलपूmल (आँप, लिची, सपाटो, रूखकटहरसहित) लाई राम्रो चिस्यान भएको किसानको ठहर छ । अनुकूल वर्षाले बालीनाली राम्रो भएपछि अन्य आइपर्ने दुःख सामान्यझैं हुने किसान बताउँछन् । 

महोत्तरीमा करीब ७२ हजार हेक्टर खेतीपातीयोग्य जग्गामध्ये १० प्रतिशतमात्र स्थायी सिँचाइ (कुलो, नहर लाग्ने) जग्गा छ । धेरैजसो जग्गामा आकासेपानीकै भरको खेती गर्नुपर्दा ठीक समयमा परेको पानी किसानलाई अमृत बर्सेजस्तै हुने गरेको गौशाला नगरपालिका–८ का बिल्टु सादामुसहरले बताए ।

मंसिर निगल्दो (अन्तिम साता) यता माघ पहिलो साताभित्र यसपालि ४० दिनभित्र ३ पटक माटो गालेर पानी परेको छ । पछिल्लो पटक शुक्रवार परेको पानीले त कैयौं सडक हिलाम्य भएका छन् । यद्यपि जिल्लाका किसान भने सडक हिलाम्य वर्षाले नभई आफ्नै प्रतिनिधिको लापरवाही र उदासीनताले भएको बताउँछन् ।

‘वर्षा त हाम्रो जीवन हो, यो बिना जीवन चल्दैन,’ औरही नगरपालिकाको चेप्कट बस्तीका पुराना राजनीतिक एंव सामाजिक कार्यकर्ता दुर्गाप्रसाद उपाध्यायले भने, ‘स्थानीय तहका जनप्रतिनिधि बाटोघाटो बनाउन, मर्मत गर्न र पानी बग्ने कुलेसा बनाउन लागेनन् भनेर पानी पर्न त छाड्नु भएन नि !’