प्रतिनिधि सभाले सोमवार सभामुख निर्वाचन प्रक्रिया अगाडि बढाउने भएको छ ।

प्रक्रियाका लागि सोमवार प्रतिनिधि सभामा २ वटा बैठक बस्दैछन् । दिउँसो १ बजे बस्ने पहिलो बैठकमा उपसभामुख डा. शिवमाया तुम्बाहाङ्फेले राजीनामा दिने तयारी गरेकी छन् ।

प्रतिनिधिसभा कार्यसञ्चालन नियमावलीको दफा २११ अनुसार सभामुखलाई सम्बोधन गरेर उपसभामुखले संसदको बैठकमै राजीनामाको तयारी गरेको संसद सचिवालय स्रोतले जानकारी दियो ।

राजीनामा लगत्तै उपसभामुख तुम्बाहाङ्फेले अन्तर्राष्ट्रिय सम्मेलन केन्द्रको शंकर हलमा पत्रकार सम्मेलनको आयोजना गरेकी छन् ।

सोमवार नै प्रतिनिधि सभाको दोस्रो बैठक राख्ने सचिवालयको तयारी छ । उपसभामुखले राजीनामा दिएपछि ज्येष्ठ सदस्य महन्थ ठाकुरले दोस्रो बैठकको अध्यक्षता गर्नेछन् । दोस्रो बैठकले सभामुख निर्वाचनका लागि निर्वाचन अधिकृत र मिति तोक्ने कार्यसूची छ ।

‘सम्भवतः भोलिका लागि उम्मेदवारी मनोनयनको मिति तोकिन्छ,’ सचिवालय स्रोतले लोकान्तरसँग भन्यो, ‘सभामुखको निर्वाचन भने राष्ट्रियसभा निर्वाचनभन्दा पछाडि गर्ने तयारी छ ।’ राष्ट्रिय सभाको निर्वाचन माघ ९ गते हुँदैछ । 
सभामुखका लागि नेकपाले अग्नि सापकोटाको नाम घोषणा गरिसकेको छ । नेपाली कांग्रेसले भने हालसम्म सभामुखको उम्मेदवारी तय गरेको छैन । 

सभामुख निर्वाचनको केही दिनमै उपसभामुखको निर्वाचन गर्ने सचिवालयको तयारी छ । संसद सचिवालयमा कार्यरत १ महिला कर्मचारीमाथि यौन दुर्व्यवहारको आरोपमा तत्कालीन सभामुख कृष्णबहादुर महराले राजीनामा गरेपछि ४ महिनादेखि प्रतिनिधिसभा सभामुखविहीन छ ।