चिनियाँ कम्पनीका कार्यकारीहरूले आफ्ना कर्मचारीहरूका लागि लाइन लागेर भुइँमा घस्रिएको भिडियो भाइरल भइरहेको छ ।

लक्ष्यअनुसारको सामान बेच्न नसकेपछि व्यवस्थापन र निर्देशकहरू हातखुट्टा टेकेर घस्रेको एक स्रोतले जनायो । 

घटनाको भिडियो उत्तरपूर्वी चीनमा रहेको जिलिन प्रान्तमा खिचिएको बताइएको छ । एक रेस्टुराँ कम्पनीको वार्षिक समारोहमा यो घटना भएको हो । उक्त कम्पनीका एक कर्मचारीले सबै सुपरभाइजरहरूले आफैंलाई यसरी सजाय दिन अघि सरेको बताए । 

कार्यकारी अधिकृतहरूले हात र गोडा टेकेर तीन परिक्रमा गरेको किनकि उनीहरूले वर्षको मध्यमा निर्धारित गरेको लक्ष्य हासिल गर्न सकेका थिएनन् । 

फूटेजमा हाकिमहरू मञ्चमुनि उभिएका देखिन्छन् ।

त्यसपछि पालैपालो उनीहरू घुँडा मार्छन् र घस्रिन थाल्छन् ।

अनि कर्मचारीहरू चाहिँ मञ्चमा उभिरहे र तीमध्ये केहीले झण्डा बोके । 

उनीहरूले यसरी अपमानजनक रूपमा घस्रिँदै गर्दा एउटा लाउडस्पीकरबाट ‘कस्सम, म जिम्मेवार छु’ भन्ने नारा घन्किन्छ ।

एजेन्सी