नवलपुरको हुप्सेकोट गाउँपालिका– ५ का वडाध्यक्ष पदमबहादुर राना वडा नम्बर ४ मा पर्ने झ्यालबासस्थित सडक छेउमा मोटरसाइकल रोकेर २ जनासँग कुराकानी गरिरहेका थिए ।

मंगलवार साँझ करीब ५ बजेको कुरा हो यो । त्यत्तिकैमा उनकै गाउँपालिकाको ग१झ ३८९ नम्बरको गाडी बत्तिएर आयो । वडाध्यक्ष रानाले केही सोच्नै भ्याएका थिएनन्, रोकिराखेको मोटरसाइकल र उनलाई पनि छोइहाल्यो ।

'गाडी एक्कासि बत्तिँदै आयो, म बाइक स्ट्याण्ड लगाएर कुरा गरिरहेको थिएँ, मलाई र बाइकलाई छोयो, त्यसपछि के भयो, भयो म आफैं अन्यौलमा छु,' बुधवार लोकान्तरको सम्पर्कमा आएका उनले घटना विवरण सुनाए ।

मंगलवारको दुर्घटनापछि उनलाई उपचारका अस्पताल लगियो । खासै ठूलो चोट नरहेकाले वडाध्यक्ष राना डिस्चार्ज भइसकेका छन् ।

वडाध्यक्ष रानाको ना१ब २५७९ नम्बरको मोटरसाइकललाई ठक्कर दिएर सडकसँगैको घरतिर मोडिएको गाडीले सिँढीमा बसिरहेका आमाछोरालाई पनि ठक्कर दियो ।

छोरा ५ वर्षीय डिपु गाहाले ज्यान गुमाए आमा २६ वर्षीय मीना गाहा घाइते छिन् । उनको चितवनको पुरानो मेडिकल कलेज भरतपुरमा उपचार भइरहेको जिल्ला प्रहरी कार्यालय नवलपुरले जनाएको छ । 

सोही दुर्घटनामा घाइते भएका ५५ वर्षीय भीमबहादुर लुंगेली र ७० वर्षीय पूर्णबहादुर लामा पनि सोही अस्पतालमा उपचाररत छन् ।

घटनाको विरोधमा स्थानीयले बुधवार गाउँपालिका तथा वडा कार्यालयहरू बन्द गराएका छन् । शैक्षिक संस्थाहरूमा पनि पढाइ भएन । गाउँपालिका कार्यालय परिसरमा भने दिनभर तनाव छ ।

गाडी सिक्न खोज्दा कर्मचारीले लिए ज्यान !

सोही गाउँपालिकाका एक जनप्रतिनिधिका अनुसार उक्त गाडी गाउँपालिका उपाध्यक्ष कोपिला मल्ललाई घर पुर्‍याउन गएको थियो । मल्ललाई पुर्‍याएर फर्किने बेलाको घटना हो त्यो ।

'उपाध्यक्षज्यूलाई पुर्‍याएर फर्किने क्रममा बीच बाटोमा आएर खाजा खाएछन्, स्थानीयका अनुसार फर्किँदा गाडीमा ३ जना थिए रे !' उनले भने ।

उनका अनुसार गाडी चलाउँदै थिए– गाउँपालिकाको कार्यालयमा कार्यरत अधिकृत शिवप्रसाद सुबेदी ।

'मोटोमोटो हुनुहुन्छ नि, उहाँको नामचाहिँ थाहा छैन, हामी सुबेदी सर भनेर चिन्छौं,' स्थानीयले गाडी चलाउने व्यक्तिबारे भनेको कुरा उद्धृत गर्दै उनले लोकान्तरलाई सुनाए ।

भएछ के भने– सुबेदीले सिक्ने प्रयोजनले गाडी चलाएका रहेछन् ।

अनियन्त्रित भएर बाइकलाई छोएपछि आत्तिएर ब्रेक दबाउन खोज्दा एक्सिलेटर खिच्न पुगेछन् ।

गाडी बत्तिएर घरतर्फ मोडियो र आफ्नो जिन्दगीको पाचौं वसन्त मात्र देखेका अबोध बालकलाई चुँडेर लग्यो ।

स्थानीयले गाडी सिक्ने कर्मचारी र चालकलाई कारवाही हुनुपर्ने माग राखेका छन् । साथै घाइतेको उपचार र मृतकका परिवारलाई उचित क्षतिपूर्ति दिनुपर्ने उनीहरूको माग छ ।

गाउँपालिका भने सुबेदीलाई बचाउने ध्याउन्नमा छ । गाउँपालिका अध्यक्ष लक्ष्मीदेवी पाण्डेले गाडी चालक फरार रहेकाले खोजी भइरहेको बताइन् ।

'म मासमा जाँदैछु, यहाँ आक्रोश छ, थप कुरा प्रहरीसँग नै सोध्नुहोला,' छोटो प्रतिक्रिया दिँदै अध्यक्ष पाण्डेले फोन राखिन् ।

आरोपित फरार रहेको र खोजी भइरहेको जिल्ला प्रहरी कार्यालय नवलपुरका डीएसपी मोहन खाँडले बताए ।

गाउँपालिकाको बेवसाइटमा राखिएको अधिकृत सुबेदीको मोबाइल नम्बरमा बुधवार दिउँसो सम्पर्कको प्रयास गर्दा स्वीच अफ छ ।