फ्रान्सका राष्ट्रपति इम्मानुएल म्याक्रोंले जेरुसेलममा रहेको फ्रान्सेली चर्चमा सशस्त्र इजरायली सुरक्षा गार्डहरूले पछ्याएपछि रिसाएर अंग्रेजीमा गाली गरेका छन् । 

बुधवार जेरुसेलमको ओल्ड टाउनमा रहेको सेन्ट एन्नी चर्चमा हिँड्दै गर्दा सुरक्षा अधिकारीहरूले कूटनीतिक मर्यादा भंग गरेपछि म्याक्रों रिसाएका हुन् । 

‘सबैलाई नियम थाहा छ,’ म्याक्रों चिच्याए । ‘तिमीले मेरोअगाडि गरेको काम मलाई मन परेन । बाहिर जाऊ ।’

एक इजरायली अधिकारी चर्चबाट बाहिर जान नमानेपछि म्याक्रोंले भने, ‘तिमीलाई नियम थाहा छ । कसैले पनि उत्तेजित बनाउनुहुँदैन । हामीहरू शान्त छौं । हामीले राम्रो कुराकानी गर्‍यौं । तिमीहरूले शहरमा राम्रो काम गरेका छौ । म त्यसको प्रशंसा गर्छु । तर नियमको सम्मान गर किनकि ती नियम शताब्दियौंदेखि छन्, ती म आउँदा परिवर्तन हुँदैनन् । त्यसैले सबैले नियमको सम्मान गर्नुपर्छ ।’

म्याक्रों चर्च अफ द होली सेपलकर पनि पुगेका थिए र त्यहाँ रहेका पादरीहरूसँग भेटघाट गरेका थिए । 

उनी सेन्ट एन्नीज चर्च पुग्दा सुरक्षा गार्डले कूटनीतिक मर्यादा उल्लंघन गरेका हुन् । उक्त चर्च ओट्टोमान साम्राज्यले नेपोलियन तेस्रोलाई सन् १८५६ मा दिएदेखि फ्रान्सको सम्पत्तिमा रहेको छ । 

म्याक्रोंले सुरक्षा गार्डहरूलाई थर्काएको भिडियो सामाजिक सञ्जालमा भाइरल भइरहेको छ ।

एजेन्सी