उडिरहेको विमानको इन्जिन फेल, ९५ यात्रुको ज्यान जोखिममा

भारतमा बुधवार राति मुम्बईबाट हैदराबादका लागि उडेको इन्डिगो एयरलाइन्सको एक विमान इन्जिन बिग्रेपछि मुम्बई फर्केको छ । 

विमान ए३२० नियोको प्य्राट यान्ड ह्विट्नी इन्जिन बीचैमा बन्द भएपछि उडेको एक घन्टामै आकस्मिक अवतरण गर्नुपरेको थियो । 


Advertisement

विमान २३ हजार फीटको उचाइमा हुँदा विमानको एक इन्जिनमा चर्को आवाजसँगै कम्पन हुन थाल्यो । त्यसपछि त्यो इन्जिन बन्द गर्नुपरेको थियो । अनि अर्को इन्जिनको सहायता लिई पाइलटले स्थानीय समयअनुसार बिहान १ बजेर ३९ मिनेटमा सुरक्षित अवतरण गरे । विगत दुई वर्षमा इन्डिगो नियोको इन्जिन २२औं पटक बिग्रेको हो । 

घटनाको अनुसन्धान गरिरहेका एक व्यक्तिले नाम नबताउने शर्तमा भने, ‘भुइँमा निरीक्षण गर्दा इन्जिन नम्बर १ को लो प्रेसर टर्बाइन नम्बर ३ खराब पाइयो । उक्त इन्जिनले ४ हजार ६ घन्टा उडान गरिसकेको थियो । विमानको दोस्रो मोडिफाइड इन्जिन उपयोग गरी सुरक्षित अवतरण गरियो । त्यसले ११ सय ९८ घन्टा उडान गरेको थियो ।’


Advertisement

इन्डिगो प्रवक्ताले बताएअनुसार, फ्लाइट नम्बर ६ई–५३८४ मा ९५ यात्री थिए । घटनाको पुष्टि गर्दै उनले प्राविधिक खराबी आएपछि विमानलाई निरीक्षणमा राखिएको बताए । 

यात्रीहरूलाई अर्को विमानमा राखेर हैदराबाद लगिएको थियो ।

एजेन्सी
 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्