निरन्तरको छलफलपछि प्रमुख प्रतिपक्षी दल नेपाली कांग्रेसभित्रको आन्तरिक विवाद हल भएको छ । विवाद हल भएसँगै केन्द्रीय समिति बैठक बहिष्कार गरेका वरिष्ठ नेता रामचन्द्र पौडेल लगायतका नेता बैठकमा सहभागी हुने भएका छन् ।

शुक्रवार सभापति शेरबहादुर देउवानिवास बुढानीलकण्ठमा बिहानैदेखि शीर्ष नेताहरूको बैठक बसेको थियो । बैठकमा सभापति देउवालगायत वरिष्ठ नेता पौडेल र अन्य शीर्ष नेताहरू उपस्थित थिए ।

बैठकमा सहभागी एक नेताले केन्द्रीय महाधिवेशनको कार्यतालिका यथावत रहने तर जिल्ला र प्रदेश लगायत अन्य संरचनाको अधिवेशनको मिति हेरफेर गर्न सकिने सहमति भएको बताए ।

लोकान्तरसँग कुरा गर्दै उनले भने, ‘केन्द्रीय महाधिवेशन यसअघि केन्द्रीय समिति बैठकले तोकेकै समय (२०७७ फागुन ७ देखि १० सम्म) हुने तर तल्ला तहका अधिवेशनको कार्यतालिका परिमार्जन गर्ने सहमति भएको छ ।

त्यस्तै पुस ११ गते बसेको केन्द्रीय समितिले गरेको विभागको संख्या बढाउने निर्णय पनि यथावत रहने भएको छ ।

पौडेलपक्षको बहिष्कारका बाबजुद बसेको केन्द्रीय समितिको बैठकले विधानले व्यवस्था गरेको २८ वटा विभागलाई बढाएर ४७ वटा बनाउने निर्णय गरेको थियो ।

त्यस्तै नेविसंघको तदर्थ समितिमा पनि सभापति देउवाले नै प्रस्ताव गरेका व्यक्ति सभापति हुने भएका छन् । देउवाले राजीव ढुंगानाको नाम प्रस्ताव गएका थिए । नेविसंघको केन्द्रीय कार्यसमिति भने पौडेल र सिटौला समूहबाट उचित प्रतिनिधित्व हुने गरी गठन गरिने सहमति भएको छ ।

अर्को भातृसंगठन नेपाल तरुण दलको म्याद थप भने सदर गरिएको छ । पुस ११ गते बसेको केन्द्रीय समितिको बैठकले तरुण दलको ६ महिना थप्ने निर्णय गरेको थियो ।

पुस ११ गतेको केन्द्रीय समिति बैठकको निर्णय फिर्ता नगरेसम्म पार्टीको औपचारिक बैठकमा समेत सहभागी नहुने घोषणा गरेका वरिष्ठ नेता पौडेल अन्तिम समयमा आएर लचक देखिएका थिए ।

पौडेलकै लचकताका कारण त्यतिबेला केन्द्रीय समितिले बहुमतको बलमा गरेका कतिपय निर्णयहरू सदर भएका छन् ।

शीर्ष नेताहरूको बैठकमा सहमति जुटेपछि कांग्रेस केन्द्रीय पार्टी कार्यालयका मुख्यसचिव कृष्ण पौडेलले माघ १३ गते केन्द्रीय समितिको बैठक बोलाइएको जानकारी दिएका छन् । बैठकमा आमन्त्रित केन्द्रीय समिति सदस्यलाई समेत उपस्थित हुन आग्रह गरिएको छ ।

कांग्रेस प्रवक्ता विश्वप्रकाश शर्माले कांग्रेसको आन्तरिक जीवनमा केही समययता जारी विवाद समाधान नजिक पुगेको बताएका छन् । शुक्रवार साँझ सामाजिक सञ्जाल ट्वीटरमा लेख्दै शर्माले संवादबाट सहमति, सहमतिका साथ महाधिवेशनका लागि यतिबेला घनिभूत छलफल जारी रहेको बताएका हुन् ।

‘नेपाली कांग्रेसको आन्तरिक जीवनमा केही समययता जारी विवाद समग्र समाधान नजिक पुगेको छ,’ उनले लेखेका छन्, ‘संवादबाट सहमति,सहमतिका साथ महाधिवेशनका लागि यतिबेला घनिभुत छलफल जारी छ । माघ १३ गते केन्द्रीय समितिको बैठकमा सबैको उत्साहपूर्वक सहभागिताका साथ हामी अघि बढ्नेछौं !’