नेपाली कांग्रेसको भ्रातृ संगठन नेपाल विद्यार्थी संघका दुई पक्षबीच पार्टी केन्द्रीय कार्यालय सानेपामा सोमवार झडप भएको छ । 

नेविसंघको अधिवेशनको माग गर्दै पार्टी कार्यालयमा धर्ना दिन पुगेका कृष्ण सिटौला समूहका विद्यार्थी र संस्थापन पक्षबीच झडप भएको हो । 

झडपका क्रममा सिटौला समूहका विद्यार्थी नेता कुन्दन काफ्ले लगायत केही विद्यार्थी घाइते भएका छन् ।

सभापति शेरबहादुर देउवा पार्टी केन्द्रीय कार्यालयमा प्रवेश गर्दैगर्दा गमला हानाहान भएको थियो ।

यता संस्थापनपक्षीय विद्यार्थीहरूले भने सभापति देउवामाथि दुर्व्यवहार गर्न खोजेपछि रोकेको प्रतिक्रिया दिएका छन् ।

सभापतिमाथि दुर्व्यवहार गर्न खोजिएपछि आफूहरूले रोकेको संस्थापनपक्षीय नेता दीपक रिमालले लोकान्तरलाई जानकारी दिए ।

झडपमा सामान्य घाइते भएका नेता काफ्लेले देउवा पक्षले गुण्डागर्दी गरेको आरोप लगाए ।

देउवा पक्षको गुण्डागर्दीको विरोधमा विद्यार्थी नेता नवराज त्रिपाठीले आमरण अनशन समेत थालेको काफ्लेले लोकान्तरलाई जानकारी दिए ।