ढुंगा, गिटी, बालुवाजस्ता नदीजन्य पदार्थ उत्खनन् र प्रयोगका सम्बन्धमा अध्ययन गर्न ५ वटा मन्त्रालयका सहसचिव सदस्य रहेको समिति गठन भएको छ ।

गृहमन्त्री रामबहादुर थापा, संघीय मामिला तथा सामान्य प्रशासन मन्त्री हृदयेश त्रिपाठी, वन तथा वातावरण मन्त्री शक्ति बस्नेत, उद्योग वाणिज्य तथा आपूर्तिमन्त्री लेखराज भट्ट र भौतिक पूर्वाधार तथा यातायात मन्त्री वसन्त नेम्वाङको उपस्थितिमा आइतवार बसेको बैठकले यस्तो निर्णय गरेको हो ।

'ढुंगा,गिटी, बालुवालगायत नदी तथा खानीजन्य पदार्थको उत्खनन् र प्रयोगका सम्बन्धमा दर्ता भए/नभएको, मापदण्ड पुगे/नपुगेको र पर्यावरणअनुकूल भए/नभएको यकिन गरी विस्तृत विवरणसहितको प्रतिवेदन दिन र हाललाई अन्तरमन्त्रालय समन्वय गरी कानूनबमोजिम कार्यान्वयनको सुनिश्चितता गर्न गृह मन्त्रालयका सह-सचिवको संयोजकत्वमा देहायको समिति गठन गर्ने,' बैठकको पहिलो निर्णयमा भनिएको छ ।

यस्तो छ समिति :
योजक - सहसचिव, गृह मन्त्रालय 
सदस्य- सहसचिव, संघीय मामिला तथा सामान्य प्रशासन मन्त्रालय
सदस्य- सहसचिव, वन तथा वातावरण मन्त्रालय
सदस्य - सहसचिव, उद्योग वाणिज्य तथा आपूर्ति मन्त्रालय
सदस्य - सहसचिव, भौतिक पूर्वाधार तथा यातायात मन्त्रालय

बैठकले खानी तथा नदीजन्य पदार्थ माटो, ढुंगा, गिटी र बालुवाको उत्खनन् तथा प्रयोगलाई व्यवस्थित गर्न मापदण्ड आवश्यक रहेकाले सो सम्बन्धमा तयार पारिएको 'राष्ट्रिय मापदण्ड' मन्त्रिपरिषद्बाट छिटाे पारित गर्न अनुरोध गर्ने निर्णय पनि गरेको छ ।