समाजवादी पार्टीका संघीय परिषद् अध्यक्ष एव पूर्वप्रधानमन्त्री डा. बाबुराम भट्टराईले प्रतिनिधि सभाले बौद्धिक नेतृत्व पाएको भन्दै सभामुख अग्नि सापकोटाको प्रशंसा गरेका छन । 

नवनिर्वाचित सभामुख सापकोटालाई बधाई दिने क्रममा मंगलवार संसद् बैठकलाई सम्बोधन गर्दै भट्टराईले सापकोटाका केही सम्झनलायक गुण रहेको बताएका हुन् ।  

‘सभामुखप्रति व्यक्तिगतरूपमा पनि प्रसन्नता व्यक्त गर्न चाहन्छु । २०४७ सालपछि २५ वर्षसम्म निकटतामा रहेर काम गर्‍यौं । यहाँका गुणहरू सम्झिन्छु । बौद्धिकता, कामप्रतिको इमान्दारिता र समर्पणले  सदनले बौद्धिक नेतृत्व पाएको छ,’ उनले भने ।

सदन प्रतिपक्षको हो भन्ने मान्यतालाई स्थापित गर्न पनि उनले सभामुख सापकोटालाई सुझाव दिए । डा. भट्टराईले जनप्रतिनिधिमूलक थलो संसद्को सभामुख बरीयतामा तल रहेको भन्दै असन्तुष्टि समेत व्यक्त गरे ।

संसद् आफैंले जन्माउने कार्यकारी प्रमुख प्रधानमन्त्री, सदनले बनाएका संविधान र कानून व्याख्या गर्ने अदालतको प्रधानन्यायाधीशभन्दा सभामुख तलको बरीयतामा रहेको भन्दै उनले प्रश्न गरे– ‘जन्माउने आमा ठूलो कि बच्चा ठूलो ? हेर्दा सानो विषय लागेपनि सांकेतिकरूपमा महत्वपूर्ण छ ।’