जर्मन सेनासँग सशस्त्र वाहनको चरम अभाव भएका कारण सैनिकहरू सैन्य तालिममा कारबाट हाम्फाल्ने अनि ट्यांक हाँकेको अभिनय गर्ने गरेका छन् । 

जर्मनीको रक्षा मन्त्रालयले पुमा ट्यांकहरूको अभावमा अभ्यास गर्नका लागि अन्य वाहनहरू तैनाथ गरिएको पुष्टि गरेको छ । 

सेनाका पुमा ट्यांकहरूमध्ये २० प्रतिशतले मात्र काम गर्ने भएकाले सैनिकहरूले कार उपयोग गरिरहेको बिल्ड पत्रिकाले लेखेको छ । 

यसअघि सन् २०१४ मा नर्वेमा भएको नाटो सैन्य अभ्यासमा जर्मन सैनिकहरूले कुचोलाई बन्दूक जस्तो देखिनेगरी रंगाएको थियो । 

पैदलसेनाको सशस्त्र वाहन नभएको विषयले आफूलाई असन्तुष्ट बनाएको मन्त्रालयले जनाएको छ । 

ठेकेदारीको समस्या र अन्य आवश्यकताका कारण आफ्ना पुराना ट्यांकहरूलाई आधुनिकीकरण गर्न समस्या आएको रक्षा मन्त्रालयले जनायो । 

पुरानो भइसकेका मार्दर ट्यांकलाई हटाएर पुमाहरू ल्याउन र नाटो रेस्पोन्स फोर्समा तैनाथ गर्न आदेश दिइसकिएको छ । 

आफ्नो सेनामा पर्याप्त खर्च नगरेको भन्दै नाटो साझेदारहरूले जर्मनीलाई प्रायः आलोचना गर्ने गरेका छन् ।