स्वास्थ्यमन्त्री भानुभक्त ढकालले नेपालमा हालसम्म १३ जनालाई कोरोना भाइरस परीक्षण गरिएको तर एकजनामा पनि पोजिटिभ नदेखिएको बताएका छन् ।

मंगलवार प्रतिनिधि सभामा सम्बोधन गर्दै मन्त्री ढकालले नेपालमा हालसम्म १३ जनामा भाइरस लागेको सम्भावना परीक्षण गरिएको बताएका हुन् ।

'यो रोग लागेको आशंकामा नेपालमा हालसम्म १३ जनाको परीक्षण भइसकेको छ,' उनले भने, 'तर हालसम्म एकजनामा पनि पोजिटिभ देखिएको छैन । यो खुसीको कुरा मान्नुपर्छ ।'

उनले नेपालमा चीनको हुवान प्रान्तबाट आएका एकजना विद्यार्थीमा मात्र कोरोना भाइरस पोजिटिभ देखिएको तर अहिले नेगेटिभ भइसकेको जानकारी दिए ।

'नेपालमा यो रोग जनवरी ९ मा हुवान प्रान्तबाट आएको एकजना विद्यार्थीमा देखिएको थियो,' मन्त्री ढकालले भने, '१३ जनवरीमा दोस्रोपटक पनि पोजिटिभ देखिएको थियो । अहिले चाहिँ नेगेटिभ देखिएको छ । यो चाहिँ हाम्रो लागि खुसीको खबर हो ।'

उनले यो रोगसँग संक्रमित भएको आशंकामा १३ जनामा परीक्षण गरेको र कसैको पनि पोजिटिभ नआएको बताए ।

मन्त्री ढकालले कोरोना भाइरस अलि ठण्डा भएको ठाउँमा आक्रामक हुने र गर्मी ठाउँमा सुषुप्त रहने जानकारी दिए ।

उनले नेपाल सरकारले आन्तरिक रूपमा धेरै तयारी गरिसकेको बताए । 'यो सावधानी अपनाउनुपर्ने अवस्था हो,' उनले भने, ' बिरामी सिकिस्त भएर अस्पताल जानुपर्ने अवस्था पनि नहुन सक्छ । २ देखि १४ दिनसम्म एकले अर्कालाई संक्रमित गराउन सक्छ र अर्को व्यक्तिलाई यो रोग लागेको थाहा नहुन पनि सक्छ ।'