उपभाेक्ता

दौरा सुरुवालको  जगेर्ना गर्न सस्तो बजार

काठमाडौँ, २१ पुस - विगतमा नेपाली राष्ट्रिय पोशाक रहेको दौरा सुरुवालको चलन हराउँदै गएको सन्दर्भमा त्यसलाई जगेर्ना गर्ने लक्ष्यका साथ राजधानीको सुन्धारामा सरल र सहजरुपमा दौरा सुरुवाल बिक्री गर्ने लक्ष्यका साथ ‘फेसन सस्तो बजार’ सुरु गरिएको छ ।

बजारका सञ्चालक सुरेश लामिछानेले नेपाली परम्परागत पोशाक हराउँदै गएको सन्दर्भमा नेपाली जनसमुदायमा राष्ट्रिय पोशाकप्रतिको लगाव बढाउन बजार सुरु गरिएको जानकारी दिनुभयो ।

नेपाली दौरा सुरुवाल, गुन्यू चोलीको प्रचलन बढाउन र नेपाली समुदायमा त्यसको थप जगेर्ना गर्नु नै आफूहरुको प्रमुख लक्ष्य रहेको बजार सञ्चालक लामिछानेले बताउनुभयो । बजारमा सस्तो मूल्यमा गुणस्तरीय फेसन सामग्री बिना कुनै बार्गेनिङ खरिद गर्न सकिने आज यहाँ आयोजित पत्रकार सम्मेलनमा जानकारी दिइयो ।

गुणस्तरीय सामान उपलब्ध गराउने लक्ष्य राखिएको जानकारी दिदै अर्का सञ्चालक भेषराज पौडेलले बजार निर्माणका लागि रु पाँच करोड खर्च भएको बताउनुभयो ।

कुल ३५ पसल रहेको बजारमा नेपाली उत्पादनलाई विशेष बढावा दिइने, अन्य व्यावसायिक संस्था एवम् पसलको भन्दा ४० प्रतिशतसम्म सस्तोमा सामान उपलब्ध गराइने उहाँले उल्लेख गर्नुभयो । उपभोक्ताले अनलाईनबाट समेत सामान खरिद गर्नसक्ने उहाँको भनाइ छ । रासस
 
पुस २१, २०७३ मा प्रकाशित

प्रतिक्रिया दिनुहोस