Ruslan
Tata /sipradi
Nic Asia

उपभाेक्ता

पेट्रोलियम पाइपलाइन राष्ट्रिय प्राथमिकतायुक्त आयोजना घोषित, पेट्रोलियम पदार्थको भाउ सस्तिने

काठमाडौं, २४ पुस –सरकारले निर्माणधिन नेपाल –भारत पेट्रोलियम पाइपलाइनलाई राष्ट्रिय प्राथमिकतायुक्त आयोजना घोषणा गरेको छ ।

राष्ट्रिय योजना आयोगले यही पुस ६ गते उक्त आयोजनालाई राष्ट्रिय प्राथमिकतायुक्त आयोजनामा समावेश गरिसकेको आयोगका प्रवक्ता खोमराज कोइरालाले लोकान्तरलाई जानकारी दिए ।

आयोजनाको महत्व, आयोजना सम्पन्न गर्न लाग्ने बजेट, आयोजनाको परिणाम लगायतका मूल्याङ्कनका आधारमा आयोजनालाई राष्ट्रिय प्राथमिकतायुक्त आयोजना घोषित गरिएको आयोगले बताएको छ ।

पेट्रोलियम पदार्थमा परनिर्भर नेपालले आपूर्तिमा अनेकौं असहजता व्यहोर्दै आएको छ । पाइपलाइन बनेपछि पेट्रोलियम पदार्थ आयातमा सहज आउने विश्वास गरिएको छ ।

यो आयोजना अमलेखगञ्जदेखि रक्सौलसम्मको ४१ किलोमिटर लम्बाईमा अहिले पाइपलाइन निर्माणको प्रक्रिया अघि बढेको छ ।

नेपाल र भारतको संयुक्त लगानीमा आयोजना निर्माण प्रक्रिया अघि बढेको छ । पाइपलाइन निर्माणका लागि झण्डै साढे ४ अर्ब रुपैयाँ लाग्ने अनुमान गरिएको छ । पाइपलाइन निर्माणका लागि ३ अर्ब २० करोड रूपैयाँ भारत सरकारले बेहोर्ने छ भने बाँकी १ अर्ब २० करोड रूपैयाँ नेपाल सरकारले व्यहोर्ने सम्झौतामा उल्लेख छ ।

पाइपलाइन निर्माणका लागि अमलेखगन्ज–रक्सौल पाइपलाइनले ओगट्ने क्षेत्रका करीव २५ हजार रूख काट्नु पर्ने नेपाल आयल निगमले तयार गरेको प्रतिवेदनमा उल्लेख छ ।

त्यस्तै, पाइपलाइन निर्माणका लागि सडक छेउका करीव ४ हजार घरटहरा भत्काउनुपर्ने प्रतिवेदनमा जनाइएको छ । पाइपलाइन विछ्याउन साढे ३३ हेक्टर जमिन चाहिने प्रतिवेदनले सुझाएको छ ।

राष्ट्रिय प्राथमिकतायुक्त आयोजनामा पर्दा आयोजनाको काम सम्पन्न गर्न सजिलो हुन्छ । यसअघि आपूर्ति मन्त्रालयले पाइपलाइनलाई राष्ट्रिय गौरवको आयोजनामा पार्न सिफारिस गरे पनि आयोगले प्राथमिकतायुक्त आयोजनामा समावेश गरेको हो ।

लामो समयदेखि चर्चामा रहेकोे पाइपलाइन निर्माण गर्न ०७२ भदौ ७ गते नेपाल र भारतबीच औपचारिक सम्झौता भएको थियो ।

पाइपलाइन बनेपछि ढुवानी लागतमा कमी आउने छ भने पेट्रोलियम पदार्थको गुणस्तर कायम हुनेछ । पाइपलाइन बनेपछि पेट्रोलियम पदार्थको भाउ पनि हालको भन्दा सस्तिने छ ।

आयोगका अनुसार मुलुकभर ४ सय ८४ आयोजनालाई राष्ट्रिय प्राथमिकतायुक्त आयोजना घोषणा गरिएको छ ।
जसमध्ये कार्यक्रम १ मा ३ सय ५३ आयोजना, कार्यक्रम २ मा १ सय १३ र कार्यक्रम ३ मा १८ आयोजना छन् । पाइपलाइन पहिलो कार्यक्रममा पर्ने आयोगले बताएको छ । आइतवार, पौष २४, २०७३ मा प्रकाशित

प्रतिक्रिया दिनुहोस

Shivam
Nepal Life insurence
ncell