रुसको ज्वेज्दा शिपयार्डले उच्चस्तरीय आणविक आइसब्रेकर जहाजको निर्माणकार्य शुरू गरेको रोसाटोमफ्लोट कम्पनीले जनाएको छ । यस जहाजको नाम रसिया राखिनेछ । 

‘यो जहाज निर्माणको इतिहासमा सबभन्दा शक्तिशाली आइसब्रेकिङ जहाज बन्नेछ,’ कम्पनीले जनायो । यसको तुलना कसैसँग पनि गर्न नमिल्ने उसको भनाइ छ । 

रुसको आइसब्रेकिङ जहाज जत्थाको नयाँ पुस्ताको निर्माणको आधाररेखा यसले कोर्ने कम्पनीको भनाइ छ । 
 

लीडर वा प्रोजेक्ट १०५१० आइसब्रेकर नाम दिइएको यसको निर्माणकार्य अप्रिल महिनामा शुरू गरिएको थियो । निर्माणका लागि ज्वेज्दा र रोसाटोमफ्लोटले एक सम्झौता गरेका थिए । सन् २०२७ सम्ममा यसले काम गर्न थाल्ने अपेक्षा गरिएको छ । 
‘

यसले पूर्वी आर्कटिकमा वर्षैभरि काम गर्न सक्ने गरी पाटपुर्जाहरू राखिएका छन्,’ रोसाटोमफ्लोटका सीईओ मुस्तफा काश्काले बताए । 

यसले ४.३ मिटर बाक्लो हिउँको पत्रलाई चिर्दै अघि बढ्न सक्नेछ अनि बन्दरगाह नआइकनै आठ महिनासम्म समुद्रमा तैरिरहन सक्नेछ । यसमा १२० मेगावाट पावरप्लान्ट हुनेछ । 

यो लीडर–क्लास आइसब्रेकरको प्रारूप पनि आकर्षक हुनेछ । यो २१० मिटर लामो हुनेछ र ४७ मिटर अग्लो हुनेछ । त्यो भनेको १३ तल्ले घर जत्रो हो ।