काठमाडौं महानगरपालिकाका मेयर बालेन्द्र (बालेन) शाहले अमेरिकी राजदूत डिन रिचार्ड थम्सनसँग प्रक्रियासंगत ढंगले भेटवार्ता भएको स्पष्ट पारेका छन् ।  एमाले नेता भीम रावलले बालेन र अमेरिकी राजदूतबीचको भेटवार्ताबारे प्रश्न उठाएपछि उनले यस्तो बताएका हुन् । बालेनले अन्य पार्टीका नेताहरुले जस्तो आफूहरुलाई  विदेशीसँग सहयोग माग्ने कुनै रहर नरहेको पनि जवाफ फर्काएका छन् । 

‘अमेरिकी राजदूतले हामीसँग पटक पटक भेट्न खोज्दा हामीले चाहिँ बरु उल्टै उहाँलाई परराष्ट्र मन्त्रालयबाट अनुमति लिएर आउनुस् भनेका हौँ र उहाँले अन्तिममा परराष्ट्र मन्त्रालयबाट अनुमति लिएर आएपछि मात्र हामीले भेट्ने अनुमति दिएका हौं’, बालेनले सामाजिक सञ्जालमार्फत् रावललाई जवाफ फर्काएका छन्, ‘हामीलाई तपाईंहरू जस्तो विदेशीसँग सहयोग माग्ने कुनै रहर छैन । उहाँले हामीलाई आर्थिक सहयोग गर्ने प्रस्ताव लिएर आउनुभएको थियो । तर हामीले हामी चाहिँ अमेरिकामा नेपाली सभ्यता झल्काउने मन्दिर अथवा पाटी पौवा बनाइदिन सहयोग गर्छौँ भनेर पठाएका छौँ।’

भेटका क्रममा एमसीसी मार्फत विद्युत विदेशीलाई बेच्ने भन्दा पनि त्यो विद्युत नेपाल मै प्रयोग गरेर आर्थिक उन्नती गर्नु पर्छ भन्ने धारणा राजदूतसँगको भेटमा राखेको पनि शाहले बताएका छन् । शाह र अमेरिकी राजदूतबीच बिहीबार भेटवार्ता भएको थियो ।