काठमाडौं – फूटबल विश्वकपमा आइतवार गोल्डेन बूट, गोल्डेन बल र गोल्डेन ग्लोभ्स पाउने खेलाडीको नाम घोषणा गरिनेछ । 

इंग्ल्यान्डका ह्यारी केनले ६ गोल गरेर गोल्डेन बूटमा दाबेदारी पेश गरेका छन् । 

उता गोलकीपरहरूले पाउने गोल्डेन ग्लोभ्स पुरस्कारको दौडमा बेल्जियमका थिबाउ कोर्टोआ सबभन्दा अघि छन् । उनले ६ म्याचमा २२ गोल बचाए । 

तर उनलाई इंग्ल्यान्डका जोर्डन पिकफोर्ड, फ्रान्सका ह्युगो लोरिस र क्रोएसियाका डेनियल सुबासिचले कडा चुनौती दिएका छन् । यी सबै गोलकीपरहरूले महत्त्वपूर्ण अवसरमा आआफ्नो टीमलाई जिताउनका लागि भूमिका खेलेका थिए । 

ब्राजिलविरुद्धको खेलमा त कोर्टोआ एक्लैले १२ गोल बचाए । त्यसैको परिणामस्वरूप ब्राजिललाई हराएर बेल्जियम सेमिफाइनलमा पुग्यो । 

अनि पिकफोर्डले कोलम्बिया र स्विडेनविरुद्ध उत्कृष्ट सेभ गरे । कोलम्बियाविरुद्धको पेनाल्टी शूटआउटमा उनले गोल बचाएकैले इंग्ल्यान्डले पेनाल्टी शूटआउटमा हार्ने खराब रेकर्डलाई पन्छाउँदै अघि बढ्न सफलता पाएको थियो । उनले ६
खेलमा कुल १० गोल बचाएका छन् ।

त्यस्तै लोरिस फ्रान्सका कप्तान र गोलकीपर हुन् र उनले फ्रान्सविरुद्ध गरिएका ७३ प्रतिशत गोल बचाएका छन् । आफ्नो टीमविरुद्ध गोल हुन नदिनका लागि उनी २१ किलोमिटर मैदानमा दौडिए । 

सुबासिचले क्रोएसियाका लागि प्रिक्वार्टरफाइनल र क्वार्टरफाइनलमा पेनाल्टी शूटआउटमा गोल जोगाएर टोलीलाई जिताए भने सेमिफाइनलमा पनि उत्कृष्ट सेभहरू गरे । रुसविरुद्धको खेलमा त चोटग्रस्त हुँदाहुँदै पनि उनी मैदानमा टिकिरहे ।
त्यसैले गर्दा क्रोएसिया फाइनलमा पुग्यो । सुबासिचले क्रोएसियाविरुद्धका ८० प्रतिशत गोल छेकेका छन् ।

एजेन्सी