विराटनगर – बिहीवार दिउँसोमा हत्या गरिएका सुनसरीको भुटाहाका विद्यालय सञ्चालक तथा प्रधानाध्यापक मौलाना खुर्सिद आलम अन्सारीको शव अझै उठ्न सकेको छैन ।

शव अहिले पनि उनको विद्यालय रैयान नेसनल स्कूलको मूल गेट अगाडिबाट उठाइएको छैन । स्थानीय संसद अन्सारीले बिहान केही नेताहरू आए पनि छलफलका लागि दिउँसो आउने भनेर हिँडेका कोही पनि नआएको बताए ।

‘बिहान केहीबेर वार्तामा म पनि बसेको थिएँ । उहाँहरूसँग शव उठाउनुपर्छ भन्ने मात्र छलफल भएको हो, त्यसपछि उठेको टोली अहिलेसम्म फर्किएको छैन,' उनले भने ।

दिउँसोको समयमा मुस्लिम समुदायका अधिकांश व्यक्तिहरू नमाज पढ्न जाने भएकोले मध्याह्व साढे १२ बजेपछि उनको शव भएको ठाउँमा १–२ जना मात्र थिए । खुर्सिद हत्यापछि स्थानीय मुस्लिम समुदाय त्रासमा छ ।

मध्याह्न साढे १२ बजेदेखि २ बजेसम्मको नमाजपछि पनि मुस्लिम समुदाय छलफलमा नआएपछि शव नै बोकेर इनरुवा जिल्ला सदरमुकाम जाने तयारीमा रहेको स्थानीयले बताएका छन्  । 

खुला सीमाको मार !

सुनसरीको भुटाहाका खुर्सिद आलमको हत्या हुनु खुला सीमाबाट सिर्जित समस्या रहेको प्रदेश सरकारका प्रवक्ता एवं आन्तरिक मामिला तथा कानून मन्त्री हिक्मत कार्की बताउँछन् ।

घटनामा खुला सीमाको दुरूपयोग भएको उनको तर्क छ । घटनालाई निन्दनीय भनेका मन्त्री कार्कीले यसबारे अनुसन्धान भइरहेको बताए ।

सीमामा अवरोध गर्न खोज्दा प्रहरीलाई नै गोली हानेको उनले बाए ।

‘प्रहरीले सिमानामा सुरक्षा दिन सकेन भन्ने कुरा हुँदैन,' मन्त्री कार्कीले भने, 'भएको प्रहरीले प्रतिरोध गर्दा उसैलाई गोली हानिएको छ ।’

उनले दिनदहाडै व्यक्तिको हत्या हुनुले स्थानीयमा अक्रोश देखिनु स्वभाविक भएको उनको भनाइ छ । मन्त्री कार्कीले पोष्टमार्टमको प्रक्रियामा अघि बढेको बताए । हत्याको विषयमा प्रदेश सरकारले गम्भीर भएर अनुसन्धान अघि बढाएको भन्दै उनले सहयोग गर्न आग्रह गरे ।