काठमाडौं– वैदेशिक रोजगारीका क्रममा कतारमा रहेका एक नेपालीले आत्महत्या गरेका छन् । कतारको एक्वा मास्र्ट कम्पनीमा बिगत ५ वर्षदेखि कार्यरत काठमाडौ जोरपाटी अत्तरखेलका ४६ वर्षीय इमानसिंह जिम्बाले गत सोमबार कम्पनीको होस्टल नजिकैको रुखमा झुन्डिएर आत्महत्या गरेको कतारबाट बिबि खरालले जानकारी दिए । 

गत मार्चमा ३ महिनाको घरबिदा सकेर पुनः कतार पुगेका जिम्बा बिगत ५ महिनादेखि कम्पनीले तलब नदिएपछि तनावमा थिए । 

रोजगारीका लागि साइप्रस पुगेका भाइको उतै निधन भएपछि २०१० जिम्बा कतार पुगेका थिए । तर कम्पनीले लामोसमय वित्दापनि तलब नपाएपछि मानसिक तनावका कारण उनले आत्महत्या गरेको अनुमान गरिएको छ । 

उक्त कम्पनीमा ४४ जना नेपाली सहित ७७ जना आप्रवासी कामदारले लामो समयसम्म तलब पाउन नसकेको खरालले जानकारी दिएका छन् । घटना बारे कतार स्थित नेपाली दूतावासलाई पटक पट्क सम्पर्क गरेर जानकारी गराउन खोज्दा समेत सम्पर्क हुन नसकेपछि मृतकको शव नेपाल पठाउन र आवश्यक कानुनी प्रक्रिया पूरा गर्न समस्या भएको छ ।