काठमाडौं– सुविन भट्टराईको चर्चित उपन्यास ‘समर लभ’मा आधारित रहेर सोही नाममा बनेको चलचित्रको पहिलो गीत सार्वजनिक गरिएको छ ।

पुष्पन प्रधानको शब्द, संगीत तथा स्वरमा ‘साया’ बोलको गीत सार्वजनिक गरिएको हो । स्वरमा पुष्पनलाई बानिका प्रधानले साथ दिएकी छिन् ।

सार्वजनिक गीतमा चलचित्रका मुख्य कलाकार आशिष पिया र रेवती क्षेत्रीलाई रोमान्टिक मुडमा फिचरिङ गरिएको छ । यो गीतमा कविराज गहतराजको कोरियोग्राफी रहेको छ । मुस्कान ढकाल निर्देशित यो चलचित्र प्रेमदिवसको अवसर पारेर माघ २५ गतेबाट प्रदर्शनमा आउँदैछ । निर्माण यूनिटकले यसअघि चलचित्रको टिजर सार्वजनिक गरिसकेको छ ।

चलचित्र ‘समर लभ’मा आशिष र रेवतीका साथमा सुरज सिंह ठकुरी, नम्रता सापकोटा, सरोज खनाल, शिशिर भण्डारी, ओम प्रतिक लगायतको पनि मुख्य भूमिका छ । सुबिनको कथालाई सामिप्यराज तिमिल्सिनाले पटकथामा ढालेका छन् भने संवादमा सामिप्य र सुविन दुबैले साझेदारी गरेका छन् । नाइटिङ्गेल इन्टरटेन्मेन्टको ब्यानरमा निर्माण भएको चलचित्रमा खगेन्द्र श्रेष्ठ र इन्दु भण्डारीको लगानी छ । चलचित्रका कार्यकारी निर्माता विनोद अधिकारी हुन् ।