काठमाडौं– अध्यागमन विभागले त्रिभुवन अन्तर्राष्ट्रिय विमानस्थलको आगमन र प्रस्थान अत्याधुनिक डेस्क स्थापना गर्ने भएको छ । 

विभागले नेपाल भित्रिने र बाहिरिने विदेश नागरिकको बायोमेट्रिक विवरण संकलन हुने गरी अत्याधुनिक डेस्क स्थापना गर्न लागेको हो । 

यस्तो डेस्क स्थापना भएपछि विश्वका जुनसुकै देशबाट पनि नेपाल भ्रमणमा आएका नागरिकको सम्पूर्ण वैयत्तिक विवरण अध्यागमन विभागसँग सुरक्षित हुने छ । वैयत्तिक विवरण संकलन भएपछि नेपालमा रहँदा विदेश नागरिकमाथि नियमन गर्ने अध्यागमन विभागका महानिर्देशक ईश्वरराज पौडेलले जनाए । 

विभागले नेपालमा भित्रिने र बाहिरिने विदेश नागरिकको विवरण राख्नका लागि छुट्टै सफ्टवेयर नै विकास गर्न लागेको छ । हाल प्रचलमा रहेको ‘ईम्मी’ नामक सफ्टवेयरलाई प्रतिस्थापन गरी नयाँ सफ्टवेयर प्रयोगमा ल्याइने छ । 

विभागले आफू मातहतकै प्राविधिक र इन्जिनियरहरुको टीम परिचालन गरेर नेपाली पोर्ट नामक नयाँ सफ्टवेयर विकास गर्न लागेको हो । 

‘अहिले विदेशमा अपराध गरेका व्यक्ति पनि सजिलै नेपाल छिर्नसक्ने अवस्था छ । वायोमेट्रिक विवरण संकलन गर्ने अत्याधुनिक डेस्क स्थापना भएपछि यस्तो खतरा कम हुनेछ,’ महानिर्देशक पौडेलले भने, ‘यसका लागि पासपोर्ट रिड गनेदेखि आँखाको नानी र औंठा छाप स्क्यान गर्ने मेसिर जडान गरिने छ ।’

विभागले २३ करोड ५८ लाख रुपैयाँ खर्च गरेर त्रिभुवन विमानस्थलको आगमन र प्रस्थान कक्षमा अत्याधुनिक डेस्क स्थापना गर्न लागेको हो । यसका लागि अर्थ मन्त्रालयबाट बजेट सुनिश्चितता आइसकेको पौडेलले जानकारी दिए । 

अर्थ मन्त्रालयले चालू आर्थिक वर्षका लागि ६ करोडको सुनश्चितता दिइसकेको पौडेलको भनाइ छ । 

अबदेखि आधुनिक भिसा स्टीकर 

अध्यागमन विभागले छिट्टै आधुनिक प्रविधियुक्त स्क्यान गर्न सकिने भिसा स्टिकर जारी गर्ने पनि तयारी थालेको छ । 

हाल अध्यागमन त्रिभुवन अन्तर्राष्ट्रिय विमानस्थलस्थित अध्यागमन विभाग र विभिन्न देशका दूतावासबाट हातले लेखेको भिसा स्टीकर पासपोर्टमा टाँस्ने गरिन्छ । यस्ता स्टीकर छिट्टै मेटिने तथा गुणस्तरका हिसावले कमजोर छन् । 

विभागले अब आईकाओको सुरक्षा मापदण्ड पूरा गर्ने गरी अन्तर्राष्ट्रियस्तरको कम्प्युटर प्रिन्टिेड मेसिन रिडेबल भिसा जारी गर्ने महानिर्देशक पौडेलले जानकारी दिए ।