काठमाडौं — ब्रेक्जिटलाई असफल बनाउनु भनेको लोकतन्त्रमाथिको विश्वासघात हुने बेलायती प्रधानमन्त्री टेरिजा मेले चेतावनी दिएकी छन् । 

सन्डे एक्सप्रेसमा लेख्दै मेले सांसदहरूलाई उनको ब्रेक्जिट सम्झौतालाई समर्थन गर्न अनुरोध गरिन् । मंगलवार हाउस अफ कमन्समा उक्त सम्झौतामाथिको महत्त्वपूर्ण मतदान हुन लागेको छ । 

सम्झौतालाई असफल बनाउँदा बेलायतले युरोपेली संघसँग कुनै सम्झौता नगरी छोड्ने वा ब्रेक्जिट नै नहुने उनले बताइन् । 

प्रधानमन्त्री कार्यालयलाई मंगलवारको मतदानमा पराजय भोग्नुपरेमा सांसदहरूले ब्रेक्जिटमाथि नियन्त्रण जमाउने डर लागेको छ । 

प्रधानमन्त्रीले युरोपेली संघसँग गरेको बहिर्गमन सहमतिमाथि हुने मतदानमा पराजय बेहोर्ने अपेक्षा गरिएको छ । यसले गर्दा ब्रेक्जिट पक्षाघातमा पर्ने केही मन्त्रीहरूले बताएका छन् । 

मेले भनिन्, ‘तपाईंले जनमत संग्रहमा मत दिन आउँदा आफ्नो आवाज सुनियोस् भनेरै आउनुभएको थियो । तपाईंहरूमध्ये केहीले दशकौंपछि पहिलोपटक राजनीतिक प्रक्रियामा विश्वास गर्नुभएको थियो । हामीले तपाईंहरूलाई निराश
पार्ने छैनौं । निराश पार्नु भनेको प्रलयकै स्थिति हो र हाम्रो लोकतन्त्रमाथिको अक्षम्य विश्वासघात हो । त्यसैले यो सप्ताहान्तमा मैले संसदलाई दिने सन्देश सरल छ ः यो खेललाई बिर्सिने बेला हो र हाम्रो देशका लागि जे राम्रो हुन्छ त्यो गर्ने
बेला हो ।’

बेलायत सन् २०१९ को मार्च २९ मा स्वतः युरोपेली संघ छोड्नेछ चाहे यो सम्झौतालाई सांसदहरूले पारित गरून्, चाहे नगरून् ।

बीबीसीबाट