जनकपुर - प्रदेश नम्बर २ का आर्थिक मामिला तथा योजना मन्त्री विजय यादवले सचिवमाथि कुटपिट गरेका छन् ।

मन्त्रालयमा कुराकानी गर्न उपस्थित भएका उद्योग, पर्यटन, वन तथा वातावरण मन्त्रालयका सचिव विद्यानाथ झालाई मन्त्री यादवले झापड हानेका हुन् ।

उक्त घटना हुँदा प्रदेशसभाका सभामुख सरोज यादव पनि मन्त्रीकै कार्यकक्षमा थिए ।

'सभामुखज्यूले बचाउन खोज्दा पनि मन्त्रीजीले हानेको हान्यै गर्नुभयो,' सचिव झाले लोकान्तरसँग भने ।

गरीबी निवारण कोषको एउटा कार्यक्रम आफन्तलाई नदिएको भन्दै आफूमाथि हातपात भएको सचिव झाको आरोप छ ।

यता मन्त्री यादवले भने आफूले सचिवमाथि हातपात नगरेको जिकिर गरेका छन् ।

'सभामुख पनि कार्यकक्षमै हुनुहुन्थ्यो, सचिवज्यू तपाईंहरू के मधेश आन्दोलन भन्नुहुन्छ, म पनि यहीँको मान्छे हो भन्दै आउनुभयो,' लोकान्तरलाई संक्षिप्त प्रतिक्रिया दिँदै मन्त्री यादवले भने, 'मैले कुटपीट गरेको छैन ।'

घटनापश्चात मन्त्री यादव मन्त्रिपरिषद् बैठकमा सहभागी हुन भन्दै मन्त्रालयबाट बाहिरिएका छन् ।