काठमाडौं– चौधरी फाउण्डेसनले खुट्टा गुमाएर अपाङ्गता भएका ५१ जनालाई कृत्रिम खुट्टा वितरण गरेको छ । 

भारतको जयपुर फुट्स नामक संस्थाको सहकार्यमा फाउण्डेसनले विभिन्न कारणले खुट्टा गुमाएर शारीरिक रुपमा अपाङ्गता बनेका ५१ जनालाई नर्भिक अस्पतालमा एक कार्यक्रम आयोजना गरी कृत्रिम खुट्टा गरेको हो ।

कृत्रिम खुट्टा वितरण गर्दै चौधरी फाउण्डेसनका अध्यक्ष विनोद चौधरीले  काठमाडौं र नवलपुरमा गरी कम्तिमा ५ सय जनालाई कृत्रिम खुट्टा निशुल्क वितरण गर्ने योजना अनुरुप आज(आइतबार) कार्यक्रमको सुभारम्भ गरिएको जनाकारी दिए । 

विभिन्न कारणले हातखुट्टा गुमाएर असजिलो जीवन विताउन बाध्य भएकाहरुलाई कृत्रिम खुट्टाको आवश्यक हुने र त्यसबाट उनीहरु बञ्चित हुन नहुने चौधरीले बताए । 

चौधरी फाउण्डेसनले खुट्टा गुमाएर अपाङ्गता भएका व्यक्तिहरुलाई दिगो रुपमा सहयोग गर्ने योजना रहेको उनले बताए ।

‘नेपालमा हाल  १ लाख व्यक्ति यस्तो समस्यामा रहनुभएको देखिन्छ, खुट्टाको अभाव हुनु भनेको हिँड डुल गर्न नसक्नै मात्रै होइन, मानिसको सारा जीवन नै निकै अप्ठ्यारो अवस्थाबाट गुज्रिरहेको हुन्छ,’ चौधरीले भने, ‘हाल सरकारी र गैर सरकारी क्षेत्रबाट समेत यो समस्या समाधानमा प्रभावकारी काम भइरहेको देखिँदैन । हामी यस कार्यक्रमलाई दिगो रुपमा संचालन गर्ने सोच बनाएका छौं ।’

उनले नवलपुरको सहज अस्पतालसँग सहकार्य गरी कृत्रिम खुट्टा निर्माण तथा वितरण गर्ने योजना रहेको बताए ।

कार्यक्रममा उपप्रधान एवं स्वास्थ्य तथा जनसंख्या मन्त्री उपेन्द्र यादवले नेपाल र भारतबीच धेरै सम्झौताहरु भए पनि स्वास्थ्य क्षेत्र भने छुटेको बताए । 

उनले भारत र नेपालको स्वास्थ्य क्षेत्रबीच सम्झौता हुन लागेको भन्दै नेपालको यस्ता कार्यमा भारतले सहयोग गर्ने अपेक्षा गरे । 

मन्त्री यादवले  हिन्दी भाषामा बोल्दै भने, ‘नेपाल र भारतबीच धेरै सम्झौता हुँदै आएका छन् । तर, स्वास्थ्य क्षेत्र छुटेको छ,’ यादवले भने, ‘तर, छिटै नै सम्झौताको लागि एमओयूको तयारी हुँदै छ । मन्त्रिपरिषदले यसलाई स्वीकृत पनि गरिसकेको छ । भारत सरकारले पनि सम्झौता गर्ने भनेर बाटो खोलिदिएको छ ।’

मन्त्री यादवले भारत सरकारले नेपालको स्वास्थ्य क्षेत्रमा दिर्घकालीन रुपमा सहयोग गर्नुपर्ने बताए ।