जनकपुरधाम – २ नम्बर प्रदेशका मन्त्रीबाट कुटिएका वन मन्त्रालयका सचिव विद्यानाथ झा सोमवार कार्यालयमा हाजिर भएका छैनन् ।

प्रदेशका आर्थिक मामिला तथा योजनामन्त्री विजयकुमार यादवले सचिव झामाथि आइतवार कुटपिट गरेका थिए ।

मन्त्रालयको प्रशासन शाखाका उपसचिव जगन्नाथप्रसाद जैशवालका अनुसार उनी बिहान मेडिकल गएर निवासतिरै आराम गरिरहेको जानकारी मन्त्रालयमा आएको छ ।

सचिव कार्यालयमा नआएपनि मन्त्रालय मातहतका सबै कर्मचारी आगामी रणनीति तय गर्न बैठक बसेका छन् । आइतवार नै विज्ञप्ति निकालेर विभिन्न शाखाका प्रमुख र कर्मचारीले दोषीमाथि कारवाही हुनुपर्ने र न्यायिक छानबिन समिति गठन हुनुपर्ने माग गरेका थिए ।

थप रणनीति तय गर्न सोमवार बिहान कर्मचारीको बैठक बसिरहेको छ । मन्त्री यादवले देखाएको व्यवहारबाट कर्मचारीको मनोबल गिरेको बताइएको छ ।