काठमाडौं — संयुक्त अरब अमिरातको दुबईमा भएको एक फूटबल म्याचअघि लज्जास्पद घटना भएको छ ।

भारत र यूएईबीचको एक खेलअघि एक स्थानीय व्यक्तिले भारतीय फूटबल टीमका समर्थकहरूलाई चरा राख्ने ठूलो पिँजडामा बन्द गरिदिए । घटनाको भिडियो सामाजिक सञ्जालमा भाइल भयो । 

बिहीवार अबु धाबीमा भएको एएफसी एसियन कपको खेलमा भारत २–० गोलले पराजित भएको थियो । 

भिडियोमा देखिन्छ, एक व्यक्ति हातमा लट्ठी लिएर पिँजडा बाहिर बसिरहेका छन् र कैद गरिएका व्यक्तिहरूसँग कुरा गरिरहेका छन् । खेलमा यूएईलाई समर्थन गर्छौ कि भारतलाई भनी उनी सोध्छन् । 

उनीहरूले भारतको समर्थन गर्ने बताएपछि यो राम्रो कुरा नभएको र यहाँ बसेर काम गर्दा यहीँको टीमलाई समर्थन गर्नुपर्ने उनी बताउँछन् । उनले बारम्बार यो प्रश्न गर्दा भारतीयहरूले त्यही उत्तर दिइरहन्छन् । 

त्यतिले मात्र नपुगेर उनी भारतीयहरूलाई लट्ठीले पनि हिर्काउँछन् र धम्की दिन्छन् । 

यूएईको महान्यायाधिवक्ता कार्यालयले एक बयान जारी गरेर दोषीविरुद्ध कारवाही गरिएको जनाएको छ । आरोपितलाई हिरासतमा लिइएको उसको भनाइ छ । 

यो भिडियो भाइरल भएपछि भिडियो बनाउने व्यक्तिले युट्युबमा अर्को भिडियो अप्लोड गरेर यो रमाइलोका लागि मात्र शूट गरिएको र साँचो नभएको बताए । ‘यी सबै कामदार मेरो फार्ममा काम गर्छन् । हामी सबैजना एउटै थालबाट खाना खान्छौं । मैले उनीहरूलाई कुटिनँ पनि, बन्द पनि गरिनँ ।’ 

🔻دولـة الامارات العربية المتحدة
النائب العام للدولة: تم اتخاذ الإجراءات القانونية ضد صاحب فيديو حبس أشخاص من الجنسية الآسيوية داخل قفص طيور ليدفعهم لتشجيع المنتخب الإماراتي وعرضه على النيابة المختصة باعتبار أن هذا المسلك جريمة معاقب عليها قانونا ولايعبر عن قيم التسامح فالإمارات pic.twitter.com/twUlfbsXaQ

— فاطمة الحبسي (@AlhabsiFatma) January 11, 2019

एजेन्सी