सुर्खेत – एभरेस्ट क्लब दैलेखले आठबीस नगरपालिकाका विभिन्न ठाउँमा स्थनीय जनप्रतिनिधिसँगको मिलेमतोमा कर्मचारी भर्ना गरेको पाइएको छ ।

क्लबले छनौट गरेका अधिकांश पदमा नेताका नातेदारले जागिर पाएका छन् भने सर्वसाधारणलाई जागिरको प्रतिस्पर्धा ‘आकाशको फल’ भएको छ ।

क्लबले नगरपालिकाका सिहासैन, पिपलकोट, राकम कर्णाली, सिंगौडी, सात्ताला र छेपाडीका लागि कर्मचारी माग गरेपनि सबैलाई मिलेमतोमा जागिर खुवाइएको खुलेको छ । जागिर खानेहरू आठबीस नगरपालिकाका स्थानीय जनप्रतिनिधि तथा पार्टी नेताका छोरी–बुहारी रहेका छन् ।

क्लबले युवाका लागि स्वास्थ्य रुपान्तरण कार्यक्रमको लागि ६ जना अनमी आवश्यक परेको भन्दै भदौमा दैलेख जिल्लामा आवेदन माग गरेको थियो । विज्ञापनपश्चात् आठबीसका ६ वटा कोटाका लागि १३ जना अनमीले फारम भरेका थिए ।

क्लबले भदौ २४ गते लिएको लिखित परीक्षा र २५ गते लिएको मौखिक परीक्षा २ दिनमा प्रकाशित गर्ने भनिएपनि असोजमा प्रकाशित गरिएको परीक्षामा सहभागी मन्जु बुढाले बताइन् । उनका अनुसार क्लबले परीक्षामा सहभागी भएकालाई असोज १३ गते दैले बोलाएर कार्यक्रममा सहभागी गराएको थियो ।

कर्मचारी छनौट परीक्षाको नतिजा हेर्दा नगर प्रमुखकी बहिनी, वडाध्यक्षका छोरी–बुहारीको नाम छनौट गरिएको छ । आठबीस नगरपालिका–९ का वडाध्यक्ष धनबहादुर सिजापतीले छोरी धिर्जा सिजापतीलाई जागिर खुवाउन सफल भएका छन् ।

वडा नम्बर ३ का वडाध्यक्ष प्रयाग शाहीले निलम चन्द शाहीलाई जागिर खुवाउँदा वडा नम्बर ६ का वडाध्यक्ष धीरबहादुर शाहीले नातिनी निर्मला शाहीलाई जागिर खुवाएका छन् ।

नगर प्रमुख खड्गराज उपाध्यायले सात्तालाका लागि बहिनी कमला उपाध्यायलाई जागिर खुवाएका छन् । राकम कर्णालीका लागि चाहिएको कोटामा उपप्रमुख दिपा बोहोराले भाइबुहारी मन्जु बुढाको नाम निकालिन् । 

नेताका वरिपरि रहेकालाई जागिर खुवाएको कुरा अहिले आठबीसभर भुसको आगोझै फैलिएको थियो । नेपाली कांग्रेस पिपलकोटका सभापति नैनसिंह शाहीले उनकी पत्नी रोशनी शाहीलाई गाउँमा नेताले आफन्तलाई जागिर खुवाएको भनेर कुरा काट्न थालेपछि राजीनामा दिन लगाएका थिए ।

उनको राजीनामा पछि वैकल्पिकमा पारिएकी सीमा शाहीले काम गर्ने मौका पाएकी थिइन् । ‘१ अक्टोबरबाट अरुको नियुक्ति छ,’ सीमाले भनिन्, ‘रोशनीले राजीनामा गरेका कारण मलाई संस्थाले वैकल्पिक उम्मेदवार भएको बताउँदै १ नोभेम्बरबाट नियुक्ति दिएको हो ।’

नगरपालिकाको वडा नम्बर ९ का वडाध्यक्ष धनबहादुर सिजापतीले छोरीले प्रतिस्पर्धाबाटै नाम निकालेको दाबी गरेका छन् । उनले आफूले कतै कसैलाई भनसुन पनि नगरेको बताए ।

आठबीस नगरपालिकाका १ जना वडाध्यक्षले मिलेमतोभन्दा पनि पारदर्शी रुपमा कर्मचारी छनौट गर्न नगरको बैठकमा नै भनेको बताए । ‘मैले आफ्ना छोरीबुहारीभन्दा पनि गरीब जनताका छोराछोरीलाई ध्यान दिउँ भन्ने प्रस्ताव राखेको थिएँ,’ नाम उल्लेख नगर्ने शर्तमा ती वडा अध्यक्षले भने, ‘तर सबै आफन्तहरूकै नामावली सार्वजनिक गराइँदा मन खिन्न भएको छ ।’ उनले जनप्रतिनिधिले नै आफन्तलाई जागिर खुवाएको खण्डमा राम्रो सन्देश नजाने सुझाव दिएपनि कसैले कार्यान्वयन नगरेको गुनासो गरे ।

एभरेस्ट क्लब दैलेखका अध्यक्ष दिपक शाहीले आफूहरूले स्थानीयलाई प्राथमिकता दिएको कारण कसैका आफन्त परेको हुनसक्ने दाबी गरे । ‘हामीलाई को कसका के पर्छन्, थाहा थिएन,’ उनले भने, ‘हामीले परीक्षा प्रक्रिया सबै पूरा गरेका छौं ।’