काठमाडौं–प्रमुख प्रतिपक्षी दल नेपाली कांग्रेसले पूर्वप्रधानमन्त्रीद्वय गिरिजाप्रसाद कोइराला र सुशील कोइरालाको नाममा स्थापना गर्न लागिएको अस्पताल सरकारले विघटन गर्न लागेको भन्दै आपत्ति जनाएको छ । यसलाई उसले कांग्रेसको अस्तित्व माथिको हमलाको रूपमा व्याख्या गरेको छ ।

सोमवार संसदीय दलको कार्यालय सिंहदरवारमा पत्रकार सम्मेलन आयोजना गरी कांग्रेसका वरिष्ठ नेता रामचन्द्र पौडेलले स्वास्थ्य मन्त्रालयले कोइरालाद्वयको नाममा खोल्न लागिएका अस्पताल विघटनमा लैजान लागेको जानकारी आफूले पाएको बताएका हुन् ।

गिरिजाप्रसाद कोइरालाको नाममा तनहुँमा श्वास प्रश्वास र सुशीलको नाममा बाँकेको खजुरामा क्यान्सर अस्पताल निर्माणको चरणमा छ । 

यस विषयमा आफूहरूले आज प्रधानमन्त्री केपी शर्मा ओलीलाई भेट्न खोजेपनि समय नपाएको गुनासो पौडेलले गरे । ‘सहयोगीले भोलिलाई भेट्न मिलाउँला भन्नुभएको छ, यदि सरकारले ती अस्पताल विघटन ग¥यो भने सडक र सदन अबरुद्ध गर्छौं,’ पौडेलले भने । 

कोइरालाको नाममा स्थापना गर्न लागिएको अस्पताल विघटन गर्ने सरकारको तयारीलाई कांग्रेसको अस्तित्व माथिको प्रहारको रूपमा लिएको पौडेलले बताए । 

‘सरकारले जुन किसिमको संकेत दिन खोज्यो, त्यसलाई नेपाली कांग्रेसले गम्भीर ढंगले लिएको छ । सरकारले यही रवैया अगाडि बढाए, प्रतिपक्षप्रति यति पूर्वाग्रह राखेमा, कठोर कदम चाल्नुपर्ने हुन्छ,’ पौडेलले पत्रकार सम्मेलनमा भने, ‘यसलाई हामीले कांग्रेसको अस्तित्व माथिको हमलाको रूपमा लिएका छौं ।’

पौडेलले डा. गोविन्द केसीका माग पूरा गर्न सरकारको ध्यानाकर्षण समेत गराए । उनले माघ ४ गतेदेखि संसद्मा कांग्रेस सशक्त रूपमा प्रस्तुत हुने दाबी गरे ।

संसदीय दलको कार्यालयमा पत्रकार सम्मेलन गरेर संसद्मा समेत सशक्त रूपमा प्रस्तुत हुने बताए पनि पौडेल संसद्मा भने छैनन् ।

गतवर्ष भएको प्रतिनिधिसभा निर्वाचनमा उनी तत्कालीन एमाले (हाल नेकपा)का कृष्णकुमार श्रेष्ठसँग पराजित भएका थिए ।