काठमाडौं — विगत दुई वर्षमा संयुक्त राष्ट्रसंघमा कार्यरत एक तिहाइ कर्मचारी यौन शोषणको शिकार भएको एक नयाँ प्रतिवेदनमा उल्लेख गरिएको छ । 

यस्तो किसिमको दुर्व्यवहारका विषयमा भएका पहिलो सर्वेक्षणमा मंगलवार यो जानकारी प्राप्त भएको हो । राष्ट्रसंघका महासचिव एन्टोनियो गुटेरेसले कर्मचारीहरूलाई लेखेको एक पत्रमा यो अध्ययनमा केही बलिया आँकडा र प्रमाण

फेला परेको र राष्ट्रसंघलाई थप राम्रो कार्यस्थल बनाउनका लागि केही कुरामा परिवर्तन ल्याउनु जरूरी रहेको उल्लेख गरेका छन् । 

सर्वेक्षणअनुसार, विगत दुई वर्षमा तीनमध्ये एक रेस्पोन्डेन्टले कम्तीमा एकपटक यौनशोषणमा पर्नुपरेको कुरा स्वीकार गरे । तर राष्ट्रसंघमा आफ्नो कार्यकालमा भएको यौन दुर्व्यवहारको प्रश्नमा दुर्व्यवहार भएको भनी ३८.७ प्रतिशतले बताए । 

सबभन्दा बढी हुने यौन दुर्व्यवहारको प्रकारमा सेक्सुअल कथा र जोक छन् । यसबाहेक हाउभाउ, शरीर र यौन गतिविधिका सम्बन्धमा पनि आपत्तिजनक कुरा भए । 

डेलोयट नामक संस्थाले नोभेम्बर महिनामा गराएको सर्वेक्षणअनुसार, यूएन कर्मचारीहरूलाई यौन सम्बन्धी गफगाफमा जबर्जस्ती संलग्न गराइने कोशिश सबभन्दा बढी हुने गरेको छ । आपत्तिजनक इशारा र छुने जस्ता घटना पनि भएका छन् । हरेक तीनमध्ये एक पुरुष शोषक थिए भने चारमध्ये एक सुपरभाइजर वा म्यानेजर स्तरका कर्मचारी थिए । सर्वेक्षणअनुसार, लगभग १० मध्ये एक सिनियर लीडरले यौन शोषण गरेका छन् । 

यूएनले कर्मचारीका लागि यौन दुर्व्यवहारको गुनासो गर्नका लागि २४ घन्टे हेल्पलाइन शुरू गरेको छ । राष्ट्रसंघका अनुसन्धानकर्ताहरूलाई सबै गुनासाको समाधान गर्न भनिएको छ । महासचिव गुटेरेसले यौन दुर्व्यवहारप्रति शून्य सहनशीलताको नीति रहेको बताएका छन् ।

एजेन्सी