काठमाडौं – प्रमुख प्रतिपक्षी दल नेपाली कांग्रेसले चिकित्सा शिक्षा क्षेत्रको सुधारको माग गर्दै अनशनमा बसेका डा. गोविन्द केसीको माग तत्काल सम्बोधन गर्न सरकारको ध्यानाकर्षण गराएको छ । 

कांग्रेसले तत्कालै सहमतिमा फर्कने या चौतर्फी दबाब पर्खने दुईवटा विकल्प मात्र सरकारसँग भएको बताएको छ । बुधवार पार्टी केन्द्रीय कार्यालयमा पत्रकार सम्मेलनको आयोजना गरी कांग्रेस प्रवक्ता विश्वप्रकाश शर्माले डा. केसीलाई एउटा व्यक्ति भनेर अवमूल्यन नगर्न सरकारलाई चेतावनी दिएका हुन् ।

‘सहमति गर्ने र सहमति कार्यान्वयन नगर्ने प्रधानमन्त्रीको दोहोरो भूमिका कारण यस्तो अवस्था सिर्जना भएको हो,’ प्रवक्ता शर्माले भने, ‘तत्कालै सहमतिमा फर्कने या चौतर्फी दबाब पर्खने प्रधानमन्त्रीसामु दुईवटा मात्र विकल्प छन् ।’ 

आफूसँग भएको सहमति विपरीत संसदको शिक्षा तथा स्वास्थ्य समितिले पारित गरेको चिकित्सा शिक्षा विधेयक पारित गरिएको भन्दै डा. केसी इलाममा गएर अनशन बसिरहेका छन् ।

डा. केसीको स्वास्थ्य अवस्था नाजुक भन्दै जाँदा कांग्रेसले पत्रकार सम्मेलन मार्फत् केसीको मागबारे सरकारलाई दबाब सिर्जना गरेको हो ।

कांग्रेसले दुईतिहाइको दम्भ देखाउनु भन्दा विवेक प्रयोग गर्न सरकारसँग आग्रह गरेको छ ।