काठमाडौं — भियतनाममा एक रक्स्याहा रोगीसम्बन्धी अनौठो खबर सार्वजनिक भएको छ । 

अल्कोहल पोइजनिङ भयो भन्दै चिकित्सककहाँ गएका ती व्यक्तिको ज्यान बचाउनका लागि डाक्टरले १५ क्यान अर्थात् पाँच लिटर बीयर उनको पेटमा पु–याए । 

रोगीको नाम नामगुयेन वन नात हो । मिडिया रिपोर्टअनुसार, नातमा मेथनोल लेभल सामान्यभन्दा ११ सय १९ गुणा बढी भयो । मेथनोलले कलेजोलाई असर पुग्नबाट रोक्नका लागि चिकित्सकहरूको एक टोलीले पेटमा एक लिटर बीयर पु–याए । 

त्यसपछि एक घन्टाको फरकमा बारम्बार बीयर दिइयो । पन्ध्र क्यान बीयर पेटमा पुगेपछि उनलाई होश आयो । 

चिकित्सकहरूका अनुसार, अल्कोहल मेथनोल र इथेनोल दुई किसिमका हुन्छन् । कुनै रक्स्याहा व्यक्तिले अचानक पिउन बन्द गरेमा पेट हुँदै रगतमा अल्कोहल पुगिरहन्छ । त्यसले गर्दा अल्कोहलको स्तर निकै बढ्दै जान्छ । 

नातको शरीरमा मेथनोल अक्सिडाइज्ड भएर फर्मलडेहाइड बन्यो र शरीरमा एसिड बढी भएर उनी बेहोश भए । 

त्यसलाई हटाउनका लागि बीयर प्रभावकारी माध्यम बन्यो । नातलाई तीन हप्तापछि अस्पतालबाट डिस्चार्ज गरियो । उनी अहिले घरमा आराम गरिरहेका छन् ।

एजेन्सी