धनगढी – युवा कार्य नेपालद्वारा कैलालीका ५ जना फरक–फरक क्षेत्रका युवा नगदसहित उत्कृष्ट अवार्डबाट सम्मानित भएका छन् ।

धनगढीमा मंगलवार आयोजित अवार्ड वितरण समारोह तथा शान्ति र समृद्धिका लागि युवा अन्तक्र्रियाबीच नगद १०–१० हजार रुपैयाँसहित पुरस्कृत गरिएको हो ।

सुदूरपश्चिम प्रदेशका सामाजिक विकासमन्त्री कृष्णराज सुवेदीले पुरस्कार हस्तान्तरण गरेका थिए ।

पहुरा थारु दैनिकका सम्पादक प्रेम चौधरीलाई भाषा तथा पत्रकारिता क्षेत्रमा योगदान पुर्याएको भन्दै पुरस्कृत गरिएको छ भने धनगढी क्रिकेट एकेडेमीका अध्यक्ष एंव सुदूरपश्चिमाञ्च एकेडेमीका निर्देशक सुवास शाहीलाई खेलकुद तथा शिक्षा क्षेत्रमा उल्लेख्य योगदान पुर्याएको भन्दै पुरस्कृत गरिएको हो ।

आलु रोप्ने मेसिनसहित विभिन्न यन्त्र उपकरण अविष्कार गर्दै आएका युवा वैज्ञानिक राजु रानालाई विज्ञान क्षेत्रमा योगदान पुर्याएको भन्दै सम्मानित गरिएको छ ।

लामो समयदेखि स्वास्थ्य क्षेत्रमा योगदान पुर्याएको भन्दै धनगढी उपमहानगरपालिकाका स्वास्थ्य शाखा प्रमुख एंव सेती अञ्चल आयुर्वेद अस्पतालका प्रमुख डा. खगेन्द्र बमलाई पुरस्कृत गरिएको छ भने उमशिलता विधामा द्वन्द्व पीडित सीता चौधरीलाई पुरस्कृत गरिएको हो ।

सामाजिक विकास मन्त्री सुवेदीको प्रमुख अतिथ्यमा भएको कार्यक्रमको विशिष्ट अतिथि सुदूरपश्चिम प्रदेशका सांसद चुनकुमारी चौधरी र धनगढी उपमहानगरपालिकाका कार्यवाहक मेयर हिरासिंह पातली रहेका थिए ।

कार्यक्रममा अनौपचारिक क्षेत्र सेवा केन्द्र (इन्सेक) का क्षेत्रीय संयोजक खडकराज जोशी, युवा अभियन्ता ठाकुरप्रसाद करिया प्रधान लगायतको उपस्थिति रहेको थियो ।

युवा कार्यक्रम नेपालका अध्यक्ष लेखनाथ निरौला (लक्ष्मी) को अध्यक्षतामा भएको कार्यक्रमको सञ्चालन नेपालका जिल्ला फोकल पर्सन लखन चौधरीबाट भएको थियो ।