काठमाडौं -अख्तियार दुरुपयोग अनुसन्धान आयोगले करीब साढे २४ लाख विगो दाबी सहित लेखापाल शिवहरि ढकालविरुद्ध विशेष अदालतमा मुद्दा दायर गरेको छ ।

हाल धादिङको खनियाबास गाउँपालिका कार्यालयमा कार्यरत ढकालले न्याय परिषद् सचिवालयमा लेखापालका रूपमा कार्यरत रहँदा बदनियतपूर्वक रकम हिनामिना गरेको अभियोगमा अख्तियारले विशेषमा मुद्दा दायर गरेको हो ।

'सरकारी रकम तलबी भरपाई समेतका आधारमा बढी रकम भुक्तानी हुने गरी बदनियत साथ सो रकम झिकी हिनामिना, हानिनोक्सानी, दुरुपयोग गरी निजी प्रयोगमा लगाएको देखिँदा निजले भ्रष्टाचार निवारण ऐन, २०५९ को दफा १७ बमोजिमको कसुर अपराध गरेको पुष्टि हुन आएको हुँदा निजलाई बिगो रू. २४,४६,२१२/६० (चौबीस लाख छयालीस हजार दुई सय बाह्र रूपैयाँ साठी पैसा) कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को देहाय (च) बमोजिम सजाय हुन माग दाबी लिई आज विशेष अदालत काठमाडौंमा आरोप-पत्र दायर गरिएको छ,' अख्तियारका प्रवक्ता रामेश्वर दंगालद्वारा जारी विज्ञप्तिमा भनिएको छ ।