पोखरा-  दीपक मनाङ्गे भनिने राजीव गुरुङले अन्ततः पद तथा गोपनियताको शपथ लिएका छन् । गण्डकी प्रदेश सभामा सोमबार उनलाई प्रदेश सभामुख नेत्रनाथ अधिकारीले पद तथा गोपनियताको शपथ खुवाएका हुन् ।

रेशम चौधरीले शपथ लिएलगत्तै मनाङ जिल्ला प्रदेश (ख) बाट निर्वाचित दीपक मनाङ्गेको पनि शपथको लागि चौतर्फी दबाब थियोे । विभिन्न विवादित मुद्दामा मुछिएका उनले प्रदेशसभा सुरु भएको झण्डै १४ महिनापछि शपथ लिएका हुन् । शपथपछि उनले ढिलै भए पनि राम्रो भएको पत्रकारसमक्ष प्रतिक्रिया दिए ।

उनले आफू अब मनाङको बाटोघाटो, शिक्षा र स्वास्थ्यमै केन्द्रित हुने बताए । स्वतन्त्र रुपमा चुनाव जितेको भए पनि उनले पत्रकारको जिज्ञासामा अबका आफ्नो समर्थन सत्तापक्षलाई हुने जानकारी समेत दिए ।

उनको शपथ हुने थाहा पाएपछि उनी सोमबार दिउँसो काठमाडौंबाट पोखरा गाडीमा आएका थिए । यता, प्रदेशका सभामुख अधिकारीले भने, 'उहाँ (राजीव गुरुङ)ले चुनाव जित्नुभएको थियो, हामीले शपथ गरायौं ।' उनले यसभन्दा बढी बोल्न चाहेनन् ।

मनाङ्गेको शपथ हुनेभएपछि उनका शुभेच्छुकहरु पोखरा नदीपुरस्थित प्रदेशसभा बाहिर उनलाई बधाई दिन जम्मा भएका थिए । गत पुस २२ मा बसेको गण्डकी प्रदेशको कार्यव्यवस्था परामर्श समितिको बैठकले तत्कालका लागि मनाङ्गेको शपथ नगराउने र त्यसको पूर्णतः अधिकार सभामुखलाई दिने निर्णय गरेको थियो ।

प्रमुख प्रतिपक्षी नेपाली काँग्रेस, राष्ट्रिय जनमोर्चा, नयाँ शक्तिले उनको शपथ हुन नहुने अडान कायम राख्दैआएको भए पनि अन्य दल मनाङ्को पक्षमा उभिएका थिए ।

डिल्लीबजार कारागारमा रहेका मनाङ्गे ६ पुसमा सर्वोेच्चबाट तारेखमा रिहा भएपछि शपथका लागि गण्डकी प्रदेशसभा सचिवालयमा पुस १२ मा निवेदन बुझाएका थिए । कत्र्तव्य ज्यान, ज्यान मार्ने उद्योग र डाँकाचोरी मुद्दामा जेल सजाय भोगिरहेका रेशम चौधरीले शपथ लिएपछि मनाङ्गेले आफ्नो शपथका लागि यसअघि प्रदेशका मुख्यमन्त्रीलगायतसँग भेटघाट गर्दैआएका थिए ।

ज्यान मार्ने उद्योगको मुद्दा पुनरावेदन हुने र हाल थुनाबाहिर रहेकाले मनाङेले प्रदेश सांसदका रूपमा शपथ लिन पाउनुपर्ने उनको माग थियो । मनाङ्गे तत्कालीन पुनरावेदन अदातलबाट दोषी ठहर भएका तर सर्वोेच्चबाट फैसला आइनसकेकाले शपथ लिन पाउनुपर्ने तर्क उनी पक्षधरको समेत दाबी थियो ।

यता, गण्डकी प्रदेशको प्रदेशसभा नियमावलीमा फौजदारी कसूरमा दोषी ठहर भएकालाई सपथ रोक्ने वा खुला गर्ने कुनै स्पष्ट व्यवस्था नभएको भन्दै पछि सार्दैआएको थियो । नियमावलीमा बिनाजानकारी लगातार १० बैठकमा अनुपस्थित हुने सांसदको पद स्वतः खारेज हुने उल्लेख छ ।

गण्डकी प्रदेशमा नेकपासहित नेपाली काँग्रेस, नयाँ शक्ति र राष्ट्रिय जनमोर्चाको प्रतिनिधित्व छ । गण्डकी प्रदेशसभामा प्रतिनिधित्व गर्ने चार दलबाट ६० सांसद हुन् । सांसद टेकबहादुर घर्तीमगरको भने अघिल्लो महिना निधन भैसकेको छ ।