पोखरा – नेपाल पुलिस क्लबद्वारा लिग उपविजेता संंकटा क्लब छैटौं संस्करणको मनकामना केबुलकार पोखरा कप फुटबल प्रतियोगितामा पराजित भएको छ । 

पोखरा रंगशालामा शनिवार भएको अन्तिम प्रिक्वार्टरफाइनलमा पुलिसले संकटालाई २–१ गोलअन्तरले पराजित गर्दै क्वार्टरफाइनल प्रवेश गर्न सफल भएको हो । जितका लागि अभिषेक रिजाल र रवि पासवानले १–१ गोलको योगदान दिए । 

खेलको ११ औं मिनेटमै सुवास गुरुङको पासमा विदेशी खेलाडी क्याक्सेल एलनको गोलबाट अग्रता लिएपनि संकटाको अग्रता खेलको ३१ औं मिनेटमा भंग भयो । 

विपक्षी पुलिसका खेलाडी नीरकुमार राईको ब्याक पासमा अभिषेक रिजालले खेल बराबरीमा ल्याए । पहिलो हाफ बराबरीमा टुंगिएकोमा दोस्रो हाफमा संकटामाथि पुलिस हाबी देखियो । खेलको ५४ औं मिनेटमा पुलिसका लागि रवि पासवानले गोल गर्दै टीमलाई अग्रता दिए ।

विपक्षी कीपर राजाबाबु थापा बिट भएको अवस्थामा रविले बललाई जाली चुमाउन सफल भएका हुन् । रवि नै म्यान अफ दी म्याच घोषित हुँदै नगद ५ हजार पुरस्कार पाए । 

लिगमा छैटौ स्थानमा रहेको पुलिसले पोखरा रंगशालामा भने लिग उपविजेता संकटालाई पराजित गर्दै घर फर्काउन सफल भयो । यस सिजनमा खप्तड गोल्डकपको सेमिफाइनलमा पुलिसले संकटालाई पराजित गरेको थियो । लिगमा भने संकटाले २–१ ले जित हात पारेको थियो । 

जितपछि पुलिसका प्रशिक्षक अनन्तराज थापाले अर्को खेलमा स्कोरिङ सुधार्ने बताए । उनले रातारात खेलाडी पोखरा आइपुग्दा थकित भएको र सोचेजस्तो प्रदर्शन गर्न नसकेको स्वीकारे ।

उता, संकटाका प्रशिक्षक सल्यान खड्गीले गोलको मुखमा डिफेन्स कमजोर देखिएकोले पराजित हुनुपरेको बताए । उनले भने, ‘फुटबलमा गोल नै चाहिन्छ । हामीले पहिलो गोल निकाल्यौं । तर डिफेन्स कमजोर हुँदा पराजित हुनुपर्यो । दोस्रो हाफमा पुलिसका हेमन्त श्रेष्ठ घाइते हुँदै अस्पताल पुर्याइए ।’

खेल हेर्न अघिल्ला दिनका तुलनामा वेशी नै दर्शक पोखरा रंगशाला पुगेका थिए । आइतवारदेखि क्वार्टरफाइनलमा खेल शुरू हुनेछन् । पहिलो क्वार्टरफाइनलमा एपीएफ र थ्रीस्टारबीच खेल हुने आयोजकले जनाएको छ । 

कास्की जिल्ला फुटबल संघको आयोजनामा भएको प्रतियोगितामा १२ टिमको सहभागिता छ । प्रतियोगितामा पहिलो चरणको खेल जित्दै एपिएफसहित क्यामरुनको डफिन्स टिम फेमेली र ब्रिगेड व्याइज क्लब अघिल्लो चरण प्रवेश गरेका छन् ।