पोखरा – रेस्टुरेन्ट एण्ड बार एशोसियसन नेपाल (रेवान) ले ग्राहकबाट उठाउने १० प्रतिशत सेवा शुल्क खारेज गरेको विरोधमा पोखराका मजदूर आन्दोलित भएका छन् । 

विभिन्न नाराबाजी गर्दै पोखराको प्रमुख पर्यटकीय क्षेत्र लेकसाइडमा जुलुस निकालेका छन् । 

हातमा विभिन्न नाराअंकित प्लेकार्ड बोकेका सयौं मजदूरले सेन्टर प्वाइन्टबाट फेवाताल किनार हल्लन चोकसम्म जुलुस प्रदर्शन गरे । 

प्रदर्शनकारीले रेवानको निर्णय खारेज गर, १० प्रतिशत सेवा शुल्क कायम छ, मजदूरमारा रेवान मुर्दावाद, राज्यले निर्धारण गरेका सम्पूर्ण सेवा सुविधा लागू गर भन्दै नाराबाजी गरेका थिए । 

अखिल नेपाल होटल क्यासिनो तथा रेस्टुरा मजदूर संघ, नेपाल स्वतन्त्र होटल क्यासिनो तथा रेस्टुरेन्ट मजदूर युनियन र नेपाल पर्यटन तथा होटल सम्बद्ध श्रमिक संघसँग आवद्ध मजदूर सहभागी थिए । 

अन्तर्राष्ट्रिय श्रम संगठन (आईएलओ), श्रम नियमावली अनुसार होटल तथा रेस्टुराँमा १० प्रतिशत सेवा शुल्क लगाउने सहमतिअनुरुप आइएलओ तथा राज्यको कानुन अनुसार स्थापित भएको विषयमा रेवानले एकतर्फी रुपमा हटाएर ठूलो गल्ती गरेको भन्दै सच्चाउन माग गरेका छन् ।