काठमाडौं — भारतको जम्मु कश्मीरस्थित पुलवामामा सुरक्षाकर्मीहरूमाथि भएको आक्रमणको एक हप्तापछि कांग्रेसले बिहीवार प्रेस मीट गरेर सरकारसँग पाँचवटा प्रश्न गरेको छ । 

कांग्रेस प्रवक्ता रणदीप सुरजेवालाले प्रधानमन्त्रीको संवेदनशीलतामा प्रश्न उठाए ।

उनले भने, ‘पुलवामा आक्रमणपछि देश नै शोकाकुल हुँदा देशका प्रधानमन्त्री एक प्रचार फिल्मको शूटिङ गरिरहेका थिए । यति ठूलो आक्रमणपछि पनि प्रधानमन्त्रीले आफ्नो कार्यक्रम टार्ने कष्ट गरेनन्, उनले राष्ट्रिय शोकको घोषणा पनि गरेनन् ।’ 

कांग्रेसको यो चर्को आक्रमणपछि भाजपाले पनि प्रत्याक्रमण ग¥यो । 

भाजपा अध्यक्ष अमित शाहले कांग्रेसमाथि पुलवामा आक्रमणको राजनीति गरेको आरोप लगाए र प्रधानमन्त्री मोदीले दिनमा १८ घन्टा काम गर्ने गरेको बताए । 

शुक्रवार कांग्रेस अध्यक्ष राहुल गान्धीले प्रधानमन्त्री मोदीमाथि आक्रमण गर्दै तीनवटा तस्वीर ट्वीट गरे अनि व्यंग्य गर्दै फोटोशूट सरकार लेखे । 

यस ट्वीटको केही समयपछि भाजपाको आधिकारिक ट्विटर ह्यान्डलमा लेखियो, ‘राहुलजी, भारत तपाईंको फेक न्युजबाट अघाइसकेको छ । देशलाई दिग्भ्रमित गर्नका लागि बिहानका तस्वीर पोस्ट गर्न बन्द गर्नुस् । उक्त आक्रमणका बारेमा तपाईंलाई पहिले नै थाहा थियो होला तर भारतका जनताले यसको खबर साँझ मात्र पाए । अर्कोपल्ट कुनै स्टन्ट गर्दा जवानहरूको शहादतलाई समावेश नगर्नुहोला ।’

यसअघि एनडीटीभीमा प्रकाशित एक रिपोर्टअनुसार, सरकारका सूत्रहरूले के बताए भने प्रधानमन्त्री मोदीलाई पुलवामा आक्रमणको जानकारी ढिलो गरी प्राप्त भयो । 

खबर अनुसार, भाजपाले यस विषयमा प्रधानमन्त्रीको बचाउ गर्दै खराब मौसम र फोनको नेटवर्क कमजोर भएका कारण प्रधानमन्त्रीलाई आक्रमणको सूचना २५ मिनेट ढिलो भयो । 

यसबाहेक राष्ट्रिय सुरक्षा सल्लाहकार अजीत डोभालसँग सोधपुछ गरिएको खबर पनि छ ।

बीबीसी हिन्दीबाट