काठमाडौं – भूतपूर्व गोर्खा सैनिकका समस्या समाधान बारे नेपाल सरकारले बेलायतको ध्यानाकर्षण गराएको छ । 

बेलायका रक्षा राज्यमन्त्री मार्क ल्याङकेष्टरसँग परराष्ट्रमन्त्री प्रदीप ज्ञवालीले भूतपूर्व गोर्खा सैनिकका मागबारे कुरा राखेका हुन । 

भूतपूर्व गोर्खा सैनिकका समस्या समाधान, उनीहरूका मागको उचित सम्बोधन तथा त्यसको निरूपणलाई आर्थिक दायरामा मात्र सीमित नराखेर योगदानको मूल्याङ्कन हुनुपर्नेमा आफूले जोड दिएको मन्त्री ज्ञवालीले बताएका छन् । 

भूपू गोर्खा सैनिकका गुनासा सम्बोधनमा अधिकतम लचिलो हुन आग्रह गरेको र प्रत्युत्तरमा राज्यमन्त्री ल्याङकेष्टरले सकारात्मक जवाफ दिएको जानकारी दिए । उनीहरूका समस्या समाधान गर्नुपर्ने आफ्नो सुझावलाई पनि राज्यमन्त्रीले सकारात्मक रूपमा लिएको मन्त्री ज्ञवालीले बताएका छन् । 

भूपू गोर्खा सैनिकका गुनासा र समस्या सम्बोधनका सिलसिलामा बेलायत सरकारले निकट भविष्यमा घोषणा गर्ने तयारी गरेको जानकारी आफूलाई दिएको मन्त्री ज्ञवालीले बताए । 

भूतपूर्व सैनिकका प्रतिनिधि सहितको वार्ता टोली गठन गर्नुपर्छ : संग्रौला

भूतपूर्व गोर्खा सैनिकका समस्या समाधानका लागि उनीहरूका प्रतिनिधि समेत समावेश गरेर वार्ता टोली गठन गर्न सरोकारवालाले सुझाव दिएका छन् ।

संसद्को अन्तर्राष्ट्रिय सम्बन्ध समितिमा पनि यसबारे कुरा उठिरहेको र बेलायतका रक्षा राज्यमन्त्री नेपाल आएको समयमा गोर्खा सैनिकको माग सम्बोधनमा सरकारले चासो देखाउनुपर्ने समानताको पक्षमा संघर्षरत संस्थाका प्रतिनिधिहरू बताउँछन् ।

गोर्खा सत्याग्रह समितिको कानूनी सल्लाहकार संगौला भूतपूर्व गोर्खा सैनिक र उनीहरूका प्रतिनिधि भएको टोलीबीच वार्ता गरेर समस्या समाधान गर्नुपर्ने राय पेश गर्छन् ।

‘नेपाल सरकार र बेलायतका बीचमा वार्ता गरेर समस्याको समाधान गर्नुपर्छ । समानताको आधारमा समस्याको समाधान गर्न सरकारले भूपू गोर्खा सैनिकका प्रतिनिधिलाई समेत समावेश गरेर वार्ता टोली गठन गर्नुपर्छ,’ संग्रौलाले लोकान्तरसँग भने ।