काठमाडौं – ताप्लेजुङमा भएको हेलिकप्टर दुर्घटनाका मृतकलाई शुक्रवार बिहान टुँडिखेलमा सामूहिक श्रद्धाञ्जलि दिइँदै थियो ।

बुधवार भएको उक्त दुर्घटनामा परी निधन भएका संस्कृति, पर्यटन तथा नागरिक उड्डयन मन्त्री रवीन्द्र अधिकारी, यति एयरलाइन्सका प्रबन्ध निर्देशक आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ र निर्देशक ध्रुव भोछिभोया, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, हेलिकप्टरका क्याप्टेन प्रभाकर केसी र मन्त्री अधिकारीका सुरक्षाकर्मी अर्जुनकुमार घिमिरेको शव श्रद्धाञ्जलिका लागि लहरै राखिएको थियो ।

श्रद्धाञ्जलि अर्पणका लागि राष्ट्रपति, प्रधानमन्त्री सहित विशिष्ट अधिकारी, पूर्व विशिष्ट पदाधिकारी, दलका नेता कार्यकर्ता र शुभचिन्तकहरू टुँडिखेल पुगेका थिए । 

सबैको अनुहार मलिन थियो । मृतकका आफन्तहरू सम्हालिन सकिरहेका थिएनन् । डाँको छाडेर रुँदै पुष्पगुच्छा अर्पण गरिरहेका थिए ।

सोही बीचमा सोतो पहिरनमा रहेकी एक वृद्धा विक्षिप्त अवस्थामा देखिइन् । लाग्थ्यो, उनी अलमलमा छिन् । के भइरहेको छ नै थाहा छैन ।

उनी थिइन्, दुर्घटनाका मृतक अर्जुन घिमिरेकी आमा मीठू घिमिरे । अर्जुन मन्त्री रवीन्द्र अधिकारीका पीएसओ थिए ।

उमेरले ६ दशक पार गरेकी मीठूले पति गुमाएको ६ महिना मात्र भयो । उनको शरीरमा सेतो पहिरन अझै छ ।

नेपाल आर्मीमा जमदार रहेका छोरा अर्जुन उनका सहारा थिए । रामेछापस्थित निवासमै रहेका बेला खबर पुग्यो, छोरा सवारी दुर्घटनामा परेर घाइते भयो । घाइते छोरालाई भेट्न भनेर उनलाई काठमाडौं ल्याइयो ।

छोराको मृत्युको खबर सुनाउँदा काठमाडौं ल्याउनै मुस्किल पर्ने भएकाले आफन्तहरूले घाइते भएको भनेर सुनाएका थिए ।

एक्कासि छोरालाई श्रद्धाञ्जलि दिनुपर्ने सुन्दा उनी अर्धचेत नै भइन् । सम्हालिन सकिनन् । आफन्तहरूले जसोतसो शव राखेको बाकस अगाडि पुर्‍याए ।

शव राखेको बाकस खोलेर अन्तिम पटक छोराको अनुहार हेर्न पनि पाइनन्, किनकी दुर्घटनामा शव चिन्नै नसकिने गरी जलेको छ ।

माला चढाउन लाग्दा उनका हात बाउँडिए । बल्लतल्ल राखिदिइन् ।

त्यसपछि केहीबेर घोप्टिइन् र बिलौना गरिरहिन् ।

मीठूलाई आफ्नै शरीर भारी भइरहेको थियो । त्यतिबेला शरीरलाई सहारा त आफन्त र शुभचिन्तकले दिए, तर उनको जिन्दगीको सहारा भने खोसिएको छ ।

पति गुमाएको ६ महिनामै मुटुको टुक्रा (छोरा) चुँडिएको छ ।