काठमाडौं– गत शुक्रवारबाट प्रदर्शनमा आएको फिल्म ‘क्याप्टेन’ हेर्न हलमा दर्शकको उल्लेखनीय उपस्थिति छ ।

दशैंलाई मध्यनजर गर्दै प्रदर्शनमा आएको फिल्म ‘छक्का पञ्जा ३’पछि ‘क्याप्टेन’ हेर्न हलमा दर्शकको भिड लागेको हल सञ्चालक तथा वितरकले बताएका छन् । उनीहरूले अभिनेता अनमोल केसीको स्टारडम हलमा देखिएको दाबी गरेका छन् ।  

यद्यपि, समीक्षकहरूबाट भने फिल्मलाई त्यति राम्रो प्रतिक्रिया मिलिरहेको छैन । समीक्षकहरूका अनुसार फिल्म धेरै ठाउँमा फिल्म चुकेको छ । ‘ऐश्वर्य’ फेम्ड निर्देशक दिवाकर भट्टराईले ‘क्याप्टेन’ निर्देशन गरेका हुन् । उनले फिल्मको समीक्षालाई लिएर आफ्नो प्रतिक्रिया सार्वजनिक गरेका छन् । 

निर्देशक भट्टराईले केही समीक्षकलाई भन्दा दर्शकलाई लक्षित गरेर फिल्म निर्माण गरिएको बताएका छन् । समीक्षकले रुचाउने फिल्म दर्शकले नरुचाउने र दर्शकले रुचाएको फिल्मले समीक्षात्मक रुपमा राम्रो प्रतिक्रिया नपाइरहेको यथार्थता आफूले देखेको बताउँदै ‘क्याप्टेन’ दर्शकले रुचाउने फर्मूलामा निर्माण भएको उल्लेख गरे । 

उनले फेसबूकमा एक स्टाटस लेख्दै समीक्षात्मकलाई भन्दा व्यावसायिकतालाई ध्यानमा राखेको फिल्म बनाएको उल्लेख गरे । दिवाकरले आफू निर्माता भएर आफ्नो पैसामा फिल्म बनाउँदा समीक्षात्मक हिसाबले अब्बल फिल्म बनाउने पनि उल्लेख गरेका छन् । 

तर उनले त्यो स्टाटस अहिले हटाइसकेका छन् । फूटबल खेलको कथामा भुवन केसीले निर्माण गरेको फिल्ममा अनमोलका साथमा प्रशान्त ताम्राकार, सरोज खनाल, सूर्यमाला खनाल, उपासना सिंह ठकुरी, प्रियंका एमभी, विल्सन विक्रम राई, बुद्धि तामाङ आदि कलाकारहरूको अभिनय रहेको छ ।

यस्तो छ दिवाकरले लेखेको स्टाटस :