बहुराष्ट्रिय कम्पनीका नाममा उपभोक्तामाथि खेलबाड, 'म्याङ्गो स्लाइस'मा भेटियो शंकास्पद वस्तु

फागुन २६, २०७५

काठमाडौं –बहुराष्ट्रिय कम्पनी बरुण बेभरेज प्रालिले उत्पादन गर्दै आएको म्याङ्गो स्लाइसमा शंकास्पद वस्तु भेटिएको छ । स्लाइसमा शंकास्पद वस्तु मिसावट गरेर बरुण बेभरेज प्रालिले उपभोक्ताको स्वास्थमा गम्भीर खेलबाड गर्दै आएको पाइएको हो ।

उपभोक्ताको पक्षमा आवाज उठाउँदै आएको राष्ट्रिय उपभोक्ता मञ्चले संकलन गरेको नमूनामा शंकास्पद वस्तु फेला परेको हो । मञ्चले संलकन गरेको नमूना अनुसार स्लाइसको बोतलमा शंकास्पद पारदर्शी तरलपदार्थ भेटिएको छ ।


ADVERTISEMENT

बोतलको केही भागमा स्लाइसभन्दा छुट्टै किसिमको ‘तरल पदार्थ’ देखिन्छ । बोतल हल्लाएमा मात्रै उक्त तरल पदार्थ र त्यसमा रहेको ठोस वस्तु एक आपसमा घोलिएको देखिन्छ । बोतललाई केही समयका लागि स्थिर छाडिदिएमा त्यसमा भएका ठेस र तरल पदार्थ दुवै स्पष्ट रूपमा छुट्टिएको देखिन्छ ।

राष्ट्रिय उपभोक्ता मञ्चका अध्यक्ष प्रेमलाल महर्जनले बरुण बेभरेज प्रालिले उपभोक्ताको स्वास्थमाथि गम्भीर खेलबाड गर्न खोजेको शंका उब्जिएको बताए ।

कम्पनीले ‘म्याङ्गो’ स्लाइस घोषणा गरेर बिक्री गर्दा त्यसमा अन्य कुनै पनि वस्तु नहुनु पर्ने उनको भनाइ छ ।

‘बाह्य वस्तु मिसाएर उपभोक्ताको स्वास्थमाथि गम्भीर खेलबाड गर्न खोजेको जस्तो देखिन्छ,’ उनले भने, ‘स्लाइस भनेको छ । तरल र ठोस स्पष्ट रूपमा छुट्टिएको अवस्थामा पाइयो । यो छुट्टिनु हुँदैन्थ्यो ।’

हेर्नुहोस्, भिडियो :

सरकारी कर्मचारीकै शंकास्पद भूमिका

करीब दुई साताअघि नै संकलन गरेको ‘म्याङ्गो स्लाइस’ मा भएको दुईथरि पदार्थप्रति शंका लाग्दा उपभोक्ता मञ्चले नियामक निकायलाई उजुरी गरेको दाबी गरेको छ । ठोस पदार्थ र तरल पदार्थ स्पष्ट रूपमा छुट्टिँदा त्यसको परीक्षण गरी आवश्यक कारवाही प्रक्रिया अघि बढाउन भन्दै गत १० फागुनमा नै खाद्य प्रविधि तथा गुण नियन्त्रण विभागमा उजुरी गरेको मञ्चको दाबी छ ।

खाद्य पदार्थको अनुमगन, नियमन तथा शंकास्पद वस्तुको परीक्षण गरी आवश्यक कारवाही (जरिवाना) गर्ने अधिकार पाएको सरकारी निकाय ‘खाद्य प्रविधि तथा गुण नियन्त्रण विभाग’का कर्मचरीकै भूमिका शंकास्पद देखिने मञ्चका पदाधिकारीहरू बताउँछन् ।

उजुरी गरेको दुई साता बितिसक्दा समेत विभागले उक्त बोतलमा भएको शंकास्पद पदार्थ परीक्षणमा आलटाल गर्दै आइरहेको छ । मञ्चका अध्यक्ष महर्जनले विभागका महानिर्देशक र अनुसन्धान अधिकृतहरूलाई उक्त वस्तु परीक्षणका लागि फोनमार्फत पटक–पटक आग्रह गरिएको बताए । ‘यो नमूना आफैं विभागमा लिएर जान्थेँ, हल्लिएर घोलिन्छ र ठीकै जस्तो देखिन्छ,’ महर्जनले लोकान्तरसँग भने, ‘उनीहरू नै आएर यहाँ स्थिर रहेको अवस्थामा तरल र ठोस पदार्थ स्पष्ट छुट्टिएको बोतल लिएर परीक्षण गरे भइहाल्थ्यो नि !’

उजुरी गरेको दुई साता बितिसक्दा समेत नियामक निकायले परीक्षणमा आलटाल गर्न खोजेको र अझ एक दुई दिनमा नआए आफैं लिएर विभागमा जाने महर्जनले बताए । ‘आलटाल गर्न खोज्दा उनीहरूको भूमिकामा पनि शंका उत्पन्न नहुने होइन,’ उनले भने, ‘अझै एक दुईदिन कुर्दा समेत नआएमा म आफैं लिएर विभागमा जान्छु र परीक्षण गर्न आग्रह गर्छु ।’

विभागको दुईथरी बोली

खाद्य प्रविधि तथा गुण नियन्त्रण विभागले बरुण बेभरेजका बारेमा कुनै पनि उजुरी नआएको दाबी गरेको छ । विभागका महानिर्देशक सञ्जीवकुमार कर्णले उजुरीको बारेमा थाहा नभएको बताउँदै अब थाहा भएकाले चाँडै नमूना लिनका लागि अनुसन्धान अधिकृत पठाउने बताए ।

आइतवार (आज) नै अनुसन्धान अधिकृत पठाउने र मञ्चले संकलन गरेर ल्याएको नमूना ल्याएर परीक्षण कार्य अघि बढाउने कर्णले बताए ।

‘उजुरीको बारेमा थाहा छैन,’ उनले भने, उपभोक्ता मञ्चसँग सम्पर्क गरेर म आजै अनुसन्धान अधिकृत पठाएर नमूना ल्याउन लगाउँछु ।’

त्यस्तै विभागका प्रवक्ता पूर्णचन्द्र वस्तीले बरुण बेभरेजका बारेमा सम्बन्धित अधिकारीसँग बयान लिने क्रममा शुरू भएको बताए । ‘बरुण बेभरेजवाला मान्छेहरूलाई बयान काम भइराखेको छ,’ उनले भने, ‘अझै अनरलाई बोलाउन बाँकी छ । उहाँको बयान लिन बाँकी छ । अनि मुद्दा अगाडि बढ्छ ।’

बरुण बेभरेजका बारेमा परेको उजुरीबारे अनुसन्धान भइरहेको प्रवक्ता वस्तीको भनाइ थियो ।

फागुन २६, २०७५ मा प्रकाशित

प्रेम चन्द

पत्रकार चन्द लोकान्तरका लागि आर्थिक तथा समसामयिक विषयमा रिपोर्टिङ गर्छन् । 

लेखकबाट थप...

प्रतिक्रिया दिनुहोस