सुर्खेत- प्रतिनिधि सभाका उपसभामुख डा. शिवमाया तुम्बाहाम्फे, कर्णाली प्रदेशका सभामुख राजबहादुर शाही, उपसभामुख पुष्पा घर्ती तथा सांसदहरुले पत्रकारहरुसँग नङ र मासुको जस्तै सम्बन्ध बनाएर अघि बढने प्रतिबद्धता जनाएका छन् ।

विहीवार वीरेन्द्रनगरमा कर्णाली प्रदेश संसद सचिवालयले आयोजना गरेको सांसद–सञ्चार सम्बन्ध विषयक अन्तरक्रिया कार्यक्रममा कर्णालीको समृद्धिका लागि दुवै पक्ष मिलेर अघि बढनुपर्नेमा जोड दिएका हुन् । ‘प्रदेश सभाको नियमअनुसार सबैले चल्नुपर्छ,’ उपसभामुख डा. तुम्बाहाम्फेले भनिन्, ‘संसदको मर्यादा जोगाउन सबैले लाग्नुपर्छ ।’

उनले कर्णालीका संसद र पत्रकारबीच सुमधुर सम्बन्ध रहेको आफुले पाएको बताईन् । ‘संसदहरुले शून्य समयमा विषयवस्तु केन्द्रित रहेर विषय उठान गर्नुपर्छ,’ उनले भनिन, ‘त्यसो गर्न सके पत्रकारले विषयवस्तुलाई थप बुझ्ने र राम्रो कभरेज हुने हुँदा त्यसले जनतामा सकारात्मक सन्देश जान्छ ।’

कर्णाली प्रदेश सभाका सभामुख राजबहादुर शाहीले अर्को अधिवेशनसम्म मिडिया सेन्टर बनिसक्ने बताए । ‘विभिन्न कारणले मिडिया सेन्टर निर्माणमा ढिलाई भएकाले पत्रकारहरुले असुविधा भोग्नु परेको हो,’ सभामुख शाहीले भने, ‘मिडिया सेन्टर स्थापना भइसकेपछि यहाँहरुको माग पुरा हुनेछ । कोटेशन आव्हान गरेर भएपनि आगामी वर्षे अधिवेशनसम्म हामी निर्माण कार्य सक्छौं ।’

सभामुख शाहीले प्रदेश सभा भवनमा क्यामेरा लिएर फोटो खिच्न नदिएको भन्ने आरोपको खण्डन गरे । ‘हामीले पाँच मिनेटसम्म अगाडि भिडियो खिच्ने व्यवस्था मिलाएका छौं,’ उनले भने, ‘गलत हल्लाको पछि नलाग्न म पत्रकारलाई आग्रह गर्दछु ।’

उनले नियतवश पत्रकारलाई दुःख नदिएको बताउँदै प्रदेश सभाको सुरक्षा चुनौती, संवेदनशीलता र मानका कारण त्यस्तो हुन गएको बताए । उपसभामुख पुष्पा घर्तीले अन्तरक्रिया कार्यक्रमले सबैलाई बाटो देखाएको बताईन । ‘कसरी पत्रकारसँग प्रस्तुत हुने, कस्ता सूचना दिने, कस्ता कुराहरु सदनमा बोलने जस्ता महत्वपूर्ण विषयमा सिकाई भयो ।’ उनले भनिन, ‘खासगरी महिला सांसदहरुका लागि यो कार्यक्रम कोसेढुंगा सावित हुने मेरो अपेक्षा हो ।’