विराटनगर– सुनसरीको दुहवीस्थित सरस्वती माध्यामिक विद्यालयमा वृति परामर्श तथा रोजगार मेला आयोजना हुने भएको छ । नेपाल सरकार र स्वीस सरकारको साझेदारीमा संचालित इन्स्योर परियोजना अन्तरगत दुहवी नगरपालिका, बुढीगंगा गाँउपालिका, उद्योग संगठन मोरङको संयुक्त आयोजना तथा मोरङ व्यापार संघ, हेल्भेटास नेपाल, मनमोहन पोलिटेक्निक र व्यवसायिक सीप तालिम प्रदायक संघ प्रदेश नं. १ को सहयोगमा रोजगार मेला आयोजना हुन लागेको हो । 

चैत ५ गते मंगलवार वृत्ति परामर्श तथा रोजगार मेला आयोजना गर्न लागिएको हो । नेपाल सरकारको समृद्ध नेपाल, सुखी नेपाली र ५ लाख जनालाई रोजगारी उपलब्ध गराउने नारालाई सहयोग पुर्‍‍याउने उद्देश्यले यस क्षेत्रका जनशक्तिलाई स्थानिय उद्योग/व्यवसाय, बैकिङ्ग, पर्यटन, होटल लगायतका क्षेत्रमा रोजगार उपलब्ध गराउन सहयोग पुग्ने आयोजकको दाबी छ । दुहवी, सुनसरीमा पहिलो पटक हुने वृति परामर्श तथा रोजगार मेलाको उद्घाटन मुख्यमन्त्री शेरधन राईले गर्ने छन् । 

रोजगार मेलाले रोजगारको खोजीमा रहेका जनशक्ति र रोजगारदातालाई एकै स्थानमा राखी आफनो आवश्यकता अनुसारको मानव शंसाधन खोज्न र रोज्न सहयोग पु¥याउने आयोजक उद्योग संगठन मोरङका अध्यक्ष भीम घिमिरेले जानकारी दिए । वृति परामर्श तथा रोजगार मेलामा वृत्ति विकास सम्बन्धी परामर्श सेवा तथा सूचना प्रदान गर्ने, सीपमुलक तालिम दिने संस्थाहरुको प्रदर्शनी र तालिम बारे जानकारी, रोजगार सम्बन्धी सूचना तथा रोजगार दातासंग प्रत्यक्ष सम्पर्क, निःशुल्क कार्यस्थलमा आधारित सीपमूलक तालीम सम्बन्धी जानकारी दिइने जनाइएको छ । 

त्यस्तै मेलामा स्थानीय उत्पादन प्रदर्शनी र रोजगारको अवसर प्राप्त गर्न सकिने जानकारी दिइएको छ । एकातर्फ दक्ष जनशक्ति पलायन हुने क्रममा रहनु र अर्कातर्फ उद्योग व्यवसाय लगायतका क्षेत्रले जनशक्तिको अभाव भोग्नु परिरहेकोले रोजगार मेलाबाट रोजगारदातालाई आवश्यकता अनुसारको जनशक्ति उपलब्ध हुने आशा गरिएको घिमिरेले बताए । रोजगारीकै खोजीमा युवाशक्तिलाई विदेशीनु पर्ने बाध्यताको अन्त्य गर्न केही हदसम्म मेलाले मदत पुग्नुका साथै कामको खोजीमा रहेका करिव २ हजार जनशक्तिले मेलामा प्रत्यक्ष सहभागीता जनाएर रोजगारी प्राप्त गर्ने आयोजक दुहवी नगरपालिकाका मेयर बेदनारायण गच्छदारले बताए ।

आयोजक उद्योग संगठन मोरङ, दुहवी नगरपालिका र बुढीगंगा गाउँपालिकाले विराटनगरमा संयुक्त रुपमा पत्रकार सम्मेलन गरी मेला आयोजनाको बारेमा जानकारी दिएको हो ।