काठमाडौं– महासमिति बैठकको निर्णय कार्यान्वयन हुनुपर्ने, नेपाल विद्यार्थी संघको तदर्थ समिति गठन गर्नुपर्ने भन्दै वरिष्ठ नेता रामचन्द्र पौडेल समूहले राखेको मागका कारण कांग्रेस केन्द्रीय समितिको बैठक बस्न ढिलाइ भएको छ ।

दिउँसो १ बजेका लागि तय भएको मंगलवारको बैठक पौने ४ बजेसम्म शुरू हुन सकेको छैन । 

शीर्ष नेताहरू छलफलमा रहेकाले बैठक शुरू हुन नसकेको केन्द्रीय सदस्य डिला संग्रौलाले लोकान्तरलाई जानकारी दिइन् । सभापति शेरबहादुर देउवा, रामचन्द्र पौडेल लगायतका प्रभावशाली नेताहरू छलफलमा सहभागी छन् ।

आजको बैठकबाट निर्वाचन समिति गठन गर्ने विषयमा समेत नेताहरूबीच छलफल भइरहेको प्रवक्ता विश्वप्रकाश शर्माले जानकारी दिए । 

यसअघि सोमवारको बैठकले भीष्मराज आङदम्बेको संयोजकत्वमा, देवेन्द्रराज कंडेल र किशोरसिंह राठोर रहेको समिति गठन गरेको थियो । बाँकी रहेका २ सदस्य पौडेल समूहलाई छुट्टाइएको छ ।