काठमाडौं– ‘नेपालको पानी जनताको लगानी सबै नेपाली विद्युतको सेयरधनी’ भन्ने नाराका साथ पहिलो चरणमा माथिल्लो त्रिशूली थ्री ‘बी’ साधारण सेयर (आईपीओ) बिहीबारबाट खुला हुने भएको छ । सर्वसाधारणलाई जलविद्युतको सेयर किन्न प्रेरित गर्ने उद्देश्यले पहिलो सेयर प्रधानमन्त्री केपी शर्मा ओलीले किन्ने हुनु भएको उर्जा, जलस्रोत तथा सिंचाइ मन्त्रालयले जनाएको छ । 

आईपीओ किन्न प्रधानमन्त्रीले ग्लोबल आईएमई क्यापिटल र नेपाल डिपी लिमिटेडमा २ वटा डिम्याट खाता समेत खोलिसक्नु भएको छ । बिहान साढे ९ बजे एक समारोहका बीच उहाँले आईपीओ खरिद गर्ने कार्यक्रम छ । नेपाली नागरिकको लगानीमा नै तीन हजार ५०० मेगावाट क्षमताको आयोजना निर्माण गर्ने लक्ष्यका साथ यो कार्यक्रम शुरु गर्न लागिएको हो । 

त्रिशुली जलविद्युत् कम्पनीका अनुसार पहिलो चरणमा ३७ लाख ५ हजार कित्ता साधारण सेयर बिक्री खुला गरिनेछ । कम्पनीको सेयर निष्काशन छिटोमा यही चैत ११ गते र ढिलोमा आगामी वैशाख ६ गतेसम्म हुनेछ ।