काठमाडौं- नेपालमा ‘म्याक्स टिभी एसईई डान्स च्याम्पियनशिप’ आयोजना गरिने भएको छ । 

एसईईका विद्यार्थीहरुलाई ठूलो मञ्च र अवसर प्रदान गर्ने उद्धेश्यले च्याम्पियनशिप आयोजना गर्न लागिएको बिहीवार आयोजित पत्रकार सम्मेलनमा जानकारी दिइयो । नृत्य मनोरञ्जनको साधन मात्र नभई सीपसहितको शिक्षा हो भन्ने सर्वव्यापी मान्यतालाई स्थापित गराउने उद्धेश्यसहित कार्यक्रम गर्न लागिएको कार्यक्रमका परिकल्पनाकार महेश गोदारले बताए । 

उनले वैशाख १० गतेबाट २५ गतेसम्म देशका विभिन्न शहरमा अडिसन हुने र अडिसनबाट ६० जनालाई टीभी राउण्डमा ल्याइने बताए । टीभी राउण्डमा आएका ति ६० जनालाई ‘प्लस टु’ पढ्नका लागि शतप्रतिशत छात्रवृत्ति प्रदान उनले जानकारी दिए । कार्यक्रममा विजेतालाई नगद १ लाख रुपैयाँसहित स्कुटर प्रदान गरिनेछ । त्यस्तै उपविजेतालाई नगद ३० हजार, तृतीयलाई नगर २० हजार रुपैयाँ प्रदान गरिने आयोजकले जनाएको छ । 

म्याम्स टीभीका महाप्रवन्धक दिनेश सुवेदीले अभिभावक र हाम्रो समाजमा नृत्य शिक्षा स्थापित गर्नका लागि सहकार्य गरिएको बताए । कार्यक्रममा भोटिङ राउण्ड नहुने बताउँदै निष्पक्ष निर्णय हुने उनले बताए । कार्यक्रमको निर्यायकमा भूमिकामा कोरियोग्राफर गम्भिर विष्ट, नन्दा बस्याल र प्रेम श्रेष्ठ रहनेछन् । 

कार्यक्रममा नेपाल टेलिभिजनका महाप्रबन्धक गोविन्द रोका, राष्ट्रिय नाँचघरका महाप्रवन्धक राजेश थापा, वरिष्ठ नृत्य निर्देशक राजु शाह, कमल राई, भुवनदास श्रेष्ठ, निर्यायक गम्भीर विष्ट, नारायण कडरिया लगायतले शुभकामना दिँदै नृत्यको विकासका लागि राज्य अझपनि गम्भीर बन्न नसकेको बताएका थिए । उनीहरुले नेपालका कला, संगीतसम्बन्धी छुट्टै विश्वविद्यालयको स्थापना हुनुपर्ने बताए । साथै विद्यालयमा अतिरिक्त क्रियाकलापमा मात्र नभई नृत्य, संगीतलाई अतिरिक्त पाठयक्रममा समावेश गरिनुपर्नेमा वक्ताहरुले जोड दिएका थिए । 

कार्यक्रम म्याक्स टीभीको प्रस्तुतिमा बज्रयोगिनी डान्स एण्ड म्युजिक एकेडेमीको आयोजनामा हुन लागेको हो । एनटीभी प्लस र म्याक्स टीभी अन्तर्गत १० भन्दा बढी च्यानलबाट कार्यक्रम प्रशारण हुने पत्रकार सम्मेलनमा जानकारी गराइयो ।