बार निर्वाचन : अध्यक्षका उम्मेदवार पोखरेलले सार्वजनिक गरे आफ्नो सम्पत्ति विवरण

चैत १४, २०७५

काठमाडौं-नेपाल बार एशोसिएशनको आसन्न चुनावका प्रत्यासी अधिवक्ता सुनिलकुमार पोखरेलले आफ्नो सम्पत्ति विवरण सार्वनिक गरेका छन । कानून व्यवसायीहरूको छाता संगठन नेपाल बार एसोसिएशनको नयाँ नेतृत्वको चयन गर्न चुनाव आगामी चैत १६ गते हुँदैछ । 

यसैबीच वृहत लोकतान्त्रिक समूहको तर्फबाट अध्यक्षका लागि उम्मेदवारी दिएका अधिवक्ता सुनिलकुमार पोखरेलको प्यानलले चुनावी प्रचारप्रसारलाई तीव्र पारेको छ ।  आज चुनावी सभालाई सम्बोधन गर्दै पोखरेलले आफ्नो सम्पत्ति विवरण सार्वजनिक गरेका हुन् ।


ADVERTISEMENT

कति छ सम्पत्ति ?

ललितपुरको महालक्ष्मी नगरपालिका वडा नं. ४ को कित्ता नं. ७२ मा ५ आनामा साढे दुई तल्लाको घर, भक्तपुरको दधिकोटमा वडा नं. ३ (क) को कित्ता नं. १२६२ र १२७० मा ४ आना जग्गा, मकवानपुर हेटौंडा नगरपालिका वडा नम्बर १७ मा १ कट्ठा जग्गा, र सप्तरीको राजगढ गाउँपालिका वडा नं. २ मा ४ कट्ठा १० धुर जग्गा रहेको पोखरेलले आफ्नो सम्पत्ति सार्वजनिक गर्ने क्रममा बताएका छन् ।

चल सम्पत्तिको रुपमा  पोखरेलको सुन २५ तोला, चाँदी ४० तोला,  र स्ट्याण्डर्ड चार्टड बैंक, प्रभु बैक र  बैंक अफ काठमाडौंमा ११ लाख ५० हजार नगद रहेको छ भने १० लाख बराबरको विभिन्न बैंक तथा वित्तिय संस्थामा सेयर र एक हुन्डाइको कार रहेको छ ।

अधिवक्ता पोखरेलको नेतृत्वमा उपाध्यक्ष महिलातर्फ कविता थापा (कार्की) छन् । यस्तै प्रदेशतर्फको उपाध्यक्षमा प्रदेश १ मा डिल्लीबहादुर कार्की, २ मा सुधीरकुमार कर्ण, ३ मा राजेश्वर अधिकारी, ४ मा निरञ्जनलाल राजभण्डारी, ५ मा सुनिलकुमार श्रेष्ठ, ६ मा उत्तमप्रसाद आचार्य र प्रदेश ७ मा ठेकेन्द्रराज जोशी सहितको प्यानल चुनावी मैदानमा उत्रेको छ ।

निर्वाचनमा ६४ ले उम्मेदवारी दिएका छन । नेपाल बार एसोसियसनमा २५ सदस्यीय कार्यसमितिमा १३ पदाधिकारी र १२ सदस्य रहने व्यवस्था छ ।

 

 

चैत १४, २०७५ मा प्रकाशित

प्रतिक्रिया दिनुहोस