दिल्लीमा नबन्ने भयो कांग्रेस र आम आदमी पार्टीको गठबन्धन

चैत १८, २०७५

काठमाडौं – भारतको राजधानी दिल्लीमा लोकसभा निर्वाचनका लागि आम आदमी पार्टी (आप) र कांग्रेसबीच गठबन्धन नबन्ने भएको छ । 

दिल्लीका मुख्यमन्त्री अरविन्द केजरीवालले एक बयान दिँदै कांग्रेस अध्यक्ष राहुल गान्धीले गठबन्धन गर्न नमानेको बताए । केजरीवालको यो बयानपछि राज्यमा अब त्रिकोणीय प्रतिस्पर्धा हुने भएको छ । 


ADVERTISEMENT

आइतवार दिल्लीकी पूर्व मुख्यमन्त्री तथा प्रदेश कांग्रेस कमिटी अध्यक्ष शीला दीक्षितले सोमवारसम्म आप कांग्रेस गठबन्धनको तस्वीर स्पष्ट हुने बताएकी थिइन् । यसमा कांग्रेसको आधिकारिक बयान आउने उनको भनाइ थियो ।

कांग्रेसले आधिकारिक बयान जारी गर्नुअघि नै केजरीवालले कांग्रेस अध्यक्ष राहुल गान्धीले दिल्लीमा लोकसभा चुनावका लागि आपसँग गठबन्धन गर्न अस्वीकार गरेको बताए । केजरीवालले भने, ‘हामीले राहुल गान्धीसँग बैठक गरेका थियौं तर उनले गठबन्धन बनाउन अस्वीकार गरे ।’

केजरीवालले आफ्ना तर्फबाट भाजपालाई हराउनका लागि गठबन्धनको अफर बारम्बार दिँदै आएका थिए । केजरीवालले दिल्लीसँगै पञ्जाब र हरियाणामा पनि कांग्रेससँग गठबन्धनको अफर दिएका थिए । 

दिल्ली कांग्रेसमा पनि गठबन्धनका विषयमा एकमत छैन । पीसी चाको गठबन्धन गर्नुपर्ने भन्छन् अनि शीला दीक्षित यसको विरुद्ध छिन् । 

शनिवार कांग्रेस प्रदेश कमिटी बैठकमा आपसँगको गठबन्धनका विषयमा अन्तिम फैसला राहुल गान्धीले लिने सहमति बनेको थियो । केजरीवालको आजको बयानपछि कांग्रेस र आपबीचको गठबन्धनको आशा तुहिएको छ । 

अब दिल्लीका सात सीटमा त्रिकोणीय प्रतिस्पर्धा हुने भएको छ । सन् २०१४ को लोकसभा निर्वाचनमा भाजपाले सबै सात सीट जितेको थियो । 

आपले दिल्लीका सातै क्षेत्रबाट उम्मेदवार उठाएको छ । 

एजेन्सी
 

चैत १८, २०७५ मा प्रकाशित

प्रतिक्रिया दिनुहोस

ताजा समाचार