काठमाडौं-वैदेशिक रोजगार बोर्ड सचिवालयले व्यवस्थापन गर्ने गरी 'कल सेन्टर' सञ्चालनमा आएको छ । श्रम सम्बन्ध, आन्तरिक तथा वैदेशिक रोजगार र सामाजिक सुरक्षा क्षेत्रसँग सम्बन्धित सेवाग्राहीका गुनासा प्रत्यक्ष रूपमा सुन्ने र त्यसलाई सम्बोधन गर्न स्थापना भएको उक्त कल सेन्टरलाई सोमवार श्रम, रोजगार तथा सामाजिक सुरक्षा मन्त्री गोकर्ण बिष्टले उद्घाटन गरेका छन् ।

कल सेन्टरको सञ्चालनबाट मन्त्रालय र मन्त्रालय अन्तर्गतका निकायको कार्यक्षेत्रसँग सम्बन्धित आधिकारिक सूचनाको तत्काल प्रवाह हुने मन्त्रालयले जनाएको छ । यसले सेवाग्राहीको गुनासो तत्काल सम्बोधन गर्न मदत पुग्नेछ ।

वैदेशिक रोजगारीको क्षेत्रमा ठगी लगायतका समस्यामा परी न्यायको खोजीमा रहेकाहरूले पनि उक्त कल सेन्टरमार्फत सिधै गुनासो राख्न पाउने भएका छन् । साथसाथै विदेशमा विभिन्न कारणले अलपत्र परेका वा स्वास्थ्य समस्याबाट पीडित भई घर फर्कन चाहनेहरूले पनि कल सेन्टरमार्फत आफ्ना कुराहरू सिधै सम्बन्धित निकायमा राख्न पाउने सुविधा पाउनेछन् ।

त्यस्तै विदेशमा कानूनी सहायताका लागि अनुरोध गर्न र वैदेशिक रोजगारसँग सम्बन्धित पूर्व-प्रस्थान अभिमुखीकरण कार्यक्रम, सीप विकास तालिम, वैदेशिक रोजगारीमा सुरक्षित रूपमा जान अपनाउनुपर्ने प्रक्रियाहरूका बारेमा पनि कल सेन्टरको माध्यमबाट जानकारी लिन सकिने मन्त्रालयले बताएको छ ।

गुनासो गर्न, सुझाव दिन वा जानकारी लिन चाहने सेवाग्राहीले स्वदेशबाट भए कल सेन्टरको सम्पर्क नम्बर ११४१ वा १६६००१५०००५ मा तथा विदेशबाट भए ईमेल, फेसबुक, मेसेन्जर, ईमो, भाइवर आदि जस्ता अनलाईन नेटवर्क मार्फत् निशुल्करुपमा कल सेन्टरको सम्पर्क नम्बर +९७७१५९७०००८ मा (टेलिफोन गर्दा शुल्क लाग्ने) सम्पर्क गर्न सक्ने व्यवस्था मिलाइएको छ ।